70 жыл күткен күн туады Трамп Куба туралы

Аризона штатындағы Финикс қаласында Turning Point USA ұйымының іс-шарасында сөйлеген Трамп бірқатар өзекті халықаралық мәселелерге тоқталды.

Иран тақырыбын қозғаған ол Тегеранмен келісімге келу қажеттігін тағы да атап өтіп, бұл қадам блокаданы тоқтатуға мүмкіндік беретінін айтты.

Оның сөзінше, «көптеген мәселелер алдын ала келісілген», ал байытылған уран АҚШ-қа беріледі.

Ормуз бұғазы төңірегіндегі жағдайға қатысты Трамп НАТО-ны сынға алып, альянс көмек ұсынғанымен, одан бас тартқанын жеткізді.

Оның айтуынша, «қажетті сәтте олар тиімділігін көрсетпеді».

Сондай-ақ ол Израиль мен Ливан арасындағы уақытша бітімді «теңдессіз» деп бағалап, «біз Ливанды қайтадан ұлы елге айналдырамыз» деп мәлімдеді.

Трамп «Хезболлаға» қатысты жағдай жақын арада реттеледі деген үміт білдірді.

Сонымен қатар АҚШ басшысы Израиль мен Ливан арасындағы бітім АҚШ пен Иран арасындағы келіссөздерге қатысы жоқ екенін атап өтті.

Куба мәселесіне тоқталған Трамп Венесуэла президенті Николас Мадуроға қарсы қабылданған шараларды еске алып, «бұл қуатты саясат жақын арада 70 жыл күткен күнге жетуге мүмкіндік тудырады» деді.

Оның айтуынша, бұл Куба үшін «жаңа таңның атуы» болмақ.

Трамп сондай-ақ АҚШ-тың өз энергетикалық ресурстарына басымдық беріп отырғанын айтып, елдегі мұнай өндіру көлемі Ресей мен Сауд Арабиясының жиынтық көрсеткішінен асып түсетінін және жуық арада екі есеге артуы мүмкін екенін мәлімдеді.

Бұған дейін АҚШ әскерилері президент Дональд Трамп тиісті бұйрық берген жағдайда Кубаға қатысты ықтимал операция жоспарын қарастырып жатқаны хабарланған еді.

Сондай-ақ биыл қаңтардан бері АҚШ пен Куба арасындағы қатынастардың шиеленісе түскені айтылған. Трамп әкімшілігі аралға мұнай жеткізуді шектеп, Кубаның коммунистік билігін саяси өзгерістерге мәжбүрлеу бағытын ұстанып отыр. Қазіргі таңда екі ел ықтимал экономикалық келісім жөнінде келіссөздер жүргізіп жатыр.

Осыған дейін Пентагон Кубада әскери операция жүргізуге дайындалып жатқаны туралы жазған едік.