Осы жексенбіде тағдыршешті сәт туады Тоқаев Құрылтайдың алғашқы сайлауы туралы

Президент Қасым-Жомарт Тоқаев алдағы Құрылтай сайлауын ел тағдыры үшін бетбұрысты сәт деп атады. Бұл туралы ол Қазақстан халқына үндеуінде мәлімдеді, деп хабарлайды Tengrinews.kz Ақордаға сілтеме жасап.

Президент жаңа заң шығарушы орган әралуан көзқарас пен ұлт келешегі жолындағы ұмтылыстар тоғысатын біртұтас алаң болуға тиіс екенін атап өтті.

"Құрылтай ел жаңғыруына тың серпін беретін құрылымға айналмақ", – деді ол.

Қасым-Жомарт Тоқаевтың айтуынша, біз геосаяси шиеленіс ширығып, жаһандық сын-қатерлер күшейе түскен кезеңде бет алған бағытымыздан таймай, тек алға қарай жүруіміз қажет.

"Қазақстанды әлемдегі нағыз озық мемлекеттердің қатарына қосу үшін ауқымды жұмыс атқаруымыз керек, яғни ұлттық стратегиямызды табысты жүзеге асыруымыз қажет", – деп атап өтті Президент.

Сондай-ақ Мемлекет басшысы жалпыхалықтық дауыс берудің қорытындысы бойынша Құрылтайға кәсіби мамандар мен отаншыл азаматтар сайланады деп кәміл сенетінін айтты.

"Адамдар көп жағдайда қабылданған маңызды шешімдердің шынайы құндылығын жылдар өткен соң ғана түсінеді. Алдағы жексенбі ел тағдыры үшін дәл осындай бетбұрысты сәт болады", – деді Қасым-Жомарт Тоқаев.

Мемлекет басшысы үндеуінің толық мәтіні мына сілтеме арқылы оқыңыз.

23 тамызға жоспарланған Құрылтай сайлауы Қазақстанның саяси жүйесінде жаңа парақ ашады.

Бұл – 1 шілдеде жаңа Конституцияның күшіне енуі мен қос палаталы Парламент – Мәжіліс пен Сенаттың жұмысы тоқтатылғаннан кейінгі алғашқы сайлау. Жаңа бір палаталы органдағы 145 мандатқа 7 саяси партия таласады.

Еліміз үшін бұл парламенттік науқан 1991 жылдан бергі оныншы сайлау болмақ.

Бұған дейін Президент Құрылтай сайлауы ел өміріндегі маңызды оқиға болатынын айтқан еді. Ол Қазақстан жан-жақты жаңғыру жолына түсіп, елімізде түбегейлі өзгерістер жасалып жатқанына назар аударды.

Google News арқылы жаңалықтарымызды қадағалаңыз