844 миллионның алтыны: бұрынғы шенеунік заңсыз кен орнын ұйымдастырып, сотталды

Шығыс Қазақстан облысында алтынды заңсыз өндіруді ұйымдастырғаны үшін кінәлі деп танылған екі ер адамға қатысты сот үкімі шықты. Құны 844 миллион теңгеден асатын 15 келдіен астам бағалы металл заңсыз өндірілген, деп хабарлайды Қаржылық мониторинг агенттігіне сілтеме жасаған Tengrinews.kz.

Алтын экскаваторлар мен өздігінен аударғыш көліктердің көмегімен өндірілген

ҚМА мәліметінше, заңсыз жұмыстар Ұлан ауданындағы Шыбынды учаскесінде жүргізілген. Өндіріс барысында экскаваторлар, тиегіштер, өздігінен аударғыштар және арнайы жуу жабдықтары сияқты ауыр техникалар пайдаланылған.

Сотталғандардың бірі "Азаматтарға арналған үкімет" КЕАҚ филиалы директорының бұрынғы орынбасары болып шықты. Ол Д. М. Нұртазинмен бірлесе отырып, өндірісті өз бақылауындағы EastGoldStone ЖШС арқылы ұйымдастырған.

Бұл ретте компанияның тек қатты пайдалы қазбаларды барлауға лицензиясы болған, ал алтын өндіруге рұқсаты болмаған.

"Заңсыз өндірілген алтынның көлемі 15 келіден асып, оның құны 844 миллион теңгеден аса соманы құрады. Тергеу барысында құны 382 миллион теңге болатын 6,7 келі алтын мен 579 грамм күміс тәркіленді", - деп хабарлады ҚМА.

Қылмыстық әрекет қоршаған ортаға айтарлықтай зиян келтірді. Бүлінген жердің аумағы 18,2 гектарды құрады.

Сонымен қатар заңсыз әрекет кезінде мемлекеттік орман қорына жататын ағаштар мен бұталар жойылып, зақымдалған. Экологиялық залалды жою үшін қажетті жұмыстардың құны 300 миллион теңгеден асты.

Сот құны 372 миллион теңге болатын мүлікті тәркіледі: 4 жүк көлігі, 2 экскаватор, 2 тиегіш, гидроход, сондай-ақ 10 миллион теңге және 56 мың доллар көлеміндегі қолма-қол ақша мемлекет меншігіне өтті.

Екі сотталушының әрқайсысы төрт жылға бас бостандығынан айырылды.

Үкім заңды күшіне енген жоқ.

Қазақстаннан құны миллиард теңгеге жуық табиғи байлық заңсыз шығарылған

Бізді Google-дың негізгі дереккөздер тізіміне қосыңыз