9 жылға дейін түрме: Астанадағы өліммен аяқталған төбелеске қатысушыларға үкім шықты

Астана соты 18 жастағы студенттің қазасына қатысты атышулы іс бойынша үкім шығарды. Қайғылы оқиға былтыр желтоқсанда түнгі клуб маңында болған, - деп хабарлайды Tengrinews.kz.

Сот талқылауы мамыр айында басталып, іс бойынша екі адам айыпталды.

"2026 жылғы 14 тамызда Астана қаласының қылмыстық істер жөніндегі ауданаралық соты алдын ала сөз байласу арқылы адамдар тобымен бұзақылық ниетпен денсаулыққа ауыр зиян келтіріп, абайсызда жәбірленуші Ш.-ның өліміне себеп болғаны үшін (Қылмыстық кодекстің 106-бабы 3-бөлігі) Ә. мен А.-ға қатысты айыптау үкімін жариялады", — делінген соттың Telegram-арнасында жарияланған баспасөз хабарламасында.

Іс материалдарына сәйкес, желтоқсанда Ә. және А. қаладағы ойын-сауық мекемелерінің бірінде мас болып, жәбірленушілер Г. және Ч.-мен туындаған сөз таласы кезінде оларға бірнеше соққы жасаған.

Осыдан кейін олар оқиға орнынан кетіп қалған, ал жәбірленуші Ш. алған дене жарақаттарынан оқиға орнында көз жұмды.

Сот тергеуінің қорытындысы бойынша ер адамдар қылмыстық құқықбұзушылық жасағаны үшін кінәлі деп танылды, олардың кінәсі куәгерлердің айғақтарымен, сараптама қорытындыларымен, бейнежазбаларды қараумен және тергеу әрекеттерінің басқа да хаттамаларымен дәлелденді.

Қылмыстық кодекстің 106-бабы 3-бөлігінің санкциясы мүлкі тәркіленіп немесе онсыз 8 жылдан 12 жылға дейінгі мерзімге бас бостандығынан айыру түріндегі жазаны қарастырады.

Сот сотталушы А.-ға қатысты жас баласының болуын және сотталмағанын, ал сотталушы Ә.-ге қатысты сотталмағанын жауапты жеңілдететін мән-жайлар деп таныды. Екеуіне де қатысты қылмыстың масаң күйде жасалуы жауапты ауырлататын мән-жай деп танылды.

"Адам өліміне әкеп соққан тұлғаға қарсы жасалған ауыр қылмыстың мән-жайын, іс-әрекеттің сипаты мен қоғамдық қауіптілігінің жоғары деңгейін, жеңілдететін және ауырлататын мән-жайлардың болуын, сондай-ақ жазаның баламалы шараларының жоғын ескере отырып, сот сотталған А.-ға Қылмыстық кодекстің 106-бабының 3-бөлігі бойынша 8 жыл 6 айға бас бостандығынан айыру жазасын, ал сотталған Ә.-ге Қылмыстық кодекстің 106-бабының 3-бөлігі бойынша 9 жылға бас бостандығынан айыру жазасын тағайындады", — делінген баспасөз хабарламасында.

Сот сотталғандардан 1 миллион 905 мың теңге материалдық шығын сомасын, 2 миллион теңге өкілдік шығындарды және 10 миллион теңге моральдық зиянды өндірді.

Үкім заңды күшіне енген жоқ.

Еске салайық, қаза тапқан Әди Шөкеев 24 желтоқсанда 18 жасқа толған еді, ал 27-сі күні елордалық түнгі клубтардың бірінің маңында оның өмірі қиылды. Бозбаланың анасы қайғылы оқиғадан әлі күнге дейін ес жия алмай отыр және сол түнді үреймен еске алады. Таңғы сағат бестер шамасында үлкен ұлы ата-анасына бауырының мәйітханада екенін хабарлаған.

Сондай-ақ, куәгерлердің орнатқан төбелестің басталған сәтін видеоға түсіріп алғаны хабарланды. Сонымен қатар, ер адамдардың бірі қылмыс жасалған кезде құқық қорғау органдарында қызмет еткені атап өтілді.

Google News арқылы жаңалықтарымызды қадағалаңыз