Абай облысында жеке үйлерге өртке қарсы дабыл құрылғы орнатылды

Абай облысында жылыту маусымы басталған сәттен бастап, өрт оқиғаларының саны едәуір артқан.

Өкінішке орай, былтыр 11 адам өрт пен көмірқышқыл газынан уланып қайтыс болды. Олардың екеуі бала. Ал биыл мұндай қайғылы оқиғалардың саны екі есеге көбейіп отыр. Осыған байланысты облыстық Төтенше жағдайлар департаменті қауіпсіздік шараларын күшейтіп, алдын алу бағытында ауқымды жұмыс жүргізуде. Мамандар арнайы акция ұйымдастырып, жеке тұрғын үйлерге улы түтіннен сақтайтын арнайы дабыл құрылғыларын тегін орнатып жатыр.

Алдын алу шараларына Төтенше жағдайлар департаментінің мамандары, ерікті азаматтар, полиция қызметкерлері мен жергілікті атқарушы билік өкілдері белсене атсалысуда. Іс-шара барысында тұрғын үйлердің жылыту пештері мен электр желілерінің техникалық жағдайы мұқият тексерілді.

Нұрсат Мақсат, облыстық ТЖД мемлекеттік өрт бақылау басқармасының инженері:

- Биылғы жылы 15 тамыздан бастап облыс аумағында 12 өрт тіркелді, тұрғын үй секторында. Оның ішінде қуанышқа орай зардап шеккендер жоқ. Бірақ бір улану газ фактісі тіркелген.

Зейнеткер Мейрамғазы Қыстаубаев мамандардан түтінді ерте анықтайтын арнайы құрылғыны орнатып беруді сұраған. Себебі, ескі жер үйіндегі пеш жиі түтіндеп, мазасыздық тудырады екен. «Сақтықта қорлық жоқ», дейді қария.

Мейрамғазы Қыстаубаев, қала тұрғыны:

- Әрбір жер үйге шынында да керек. Енді кейбір үйлерде балалары көп болады енді. Енді бұның былай қарасаң пайдасы көп. Аяқ астынан түтін шыға қалса, болады ғой кейде пеш те тартпай қалады. Вот сол кездерде пайдасы көп тиеді екен. 

Осындай құрылғылардың көмегімен соңғы үш жылда 21 адамның өмірін сақтап қалдық, дейді сала мамандары. 

Ерасыл Қадірбеков, мемлекеттік өрттен қорғау басқармасының бас маманы:

- Яғни осы датчик қойылған үйлерде  дыбыстық сигнал беріп, түн ортасында адамдар оянып, үйдің іші түтін кезінде оянып қауіп қатерлердің алдын алып қалды. Өте пайдалы, тиімді нәрсе. Пешпен жағатын әрбір үйге қою маңызды. 

Мамандар әлеуметтік аз қамтылған отбасыларға, көп балалы жанұяларға, мүмкіндігі шектеулі азаматтар мен зейнеткерлер тұратын тұрғын үйлерге ерекше көңіл бөліп отыр. Жер үйлердің мұржаларын тазартып, ақауларды анықтап, оларды жөндеуді қолға алған.

Рүстем Қайратұлы, Мәди Базарбеков