Алматыда газға қарсы құрылғылар орнатылды

Алматыда жылу маусымы басталғалы бері газбен улану бойынша үш жағдай тіркелді. Абырой болғанда кісі өлімі жоқ. Алайда 11 адам зардап шекті. Оның 8-і кәмелетке толмаған балалар. Осыған байланысты қалалық Төтенше жағдайлар департаментінің қызметкерлері мен газға жауапты мамандар әлеуметтік осал топтар мен зейнеткерлердің үйлерін аралап, улы газды анықтайтын датчиктер мен дабыл қаққыштар орнатты. 

Гүлназ Әшірқызы - көпбалалы ана. Үйін көмірмен жылытады. Ыстың иісін анықтайтын құрылғы орнатамыз деп келгендерді қуана қарсы алды. Себебі қауіпсіздік мәселесі бірінші орында болуы тиіс деп санайды. 

Гүлназ Әшірқызы, қала тұрғыны:

- Бұрын датчик деген нәрсе болмаған еді. От жағатын едім, қазір датчикті орнатып берді. Енді уайымдамаймын. Угардың иісі шықса дабыл соғады.

Мұндай арнайы құрылғы 700-ге тарта үйге қойылады. Соның 300-ге жуығы қатты отын жағады. Ал өзгесі табиғи газға қосылған. Олардың барлығы әлеуметтік жағынан осал топқа жатады. Осы жылу маусымы басталғалы бері 100-ден артық отбасы ыстың иісі шықса, дабыл қағатын құрылғымен қамтамасыз етілді. Оның бағасы аса қымбат емес. 1500 теңгеден басталады. Алайда соны орнатуды көпшілік елей бермейді. Оған қоса өртке қатысты қарапайым қауіпсіздік ережелерін сақтамайды. 

Дулат Жандар, қалалық ТЖД Мемлекеттік өрт бақылау басқармасының аға инженері:

- Мұржалардың тазаланбауы және пештердің қасында жанғыш заттардың көп болуы пештің қасына жанғыш заттарды көп қояды және электр желілерінің сымдарының дұрыс қаралмауы. Яғни өздері қолымен жасап байлауы сол себепті көп кемшіліктер анықталуда. 

Ал мына дабыл қаққыш табиғи газбен жылыйтын үйлер мен ғимараттарға арналған. «Газға жауапты мамандар мұны міндетті түрде орнату керек», - деп есептейді. Себебі көгілдір отынмен уланудың алдын алады. Бағасы 5 мың теңге шамасында. 

Сұлтанбек Байғазиев, апаттық диспетчерлік қызметінің жетекші инженері:

- Иістерді сезіп мына құрылғыға команда береді. Содан қауіптің алдын алады. Бұл үйде адам болған жағдайда, болмаған жағдайда, өзінің қызметін толыққанды атқарады. Газ - тілсіз жау, оның түсі болмайды не иісі болмайды. Сол үшін мұнда арнайы химикат қосылады, этилмеркаптан деген газдың иісін сезу мақсатында. 

Әлеуметтік жағынан аз қамтылған отбасылар үшін екі құрылғы да тегін. Ал басқалары өздері сатып алып, орнатуы тиіс.

Авторлары: Қарлығаш Қайыпбекова, Айдос Қалиев