Қарағанды жолдарына қар мен көктайғаққа қарсы қорған орнатылды

Қар мен боранға қарсы жүйелі дайындық

«ҚазАвтоЖол» АҚ Қарағанды облыстық филиалының хабарлауынша, 2025–2026 жылдардағы қысқы маусымға дайындық белгіленген кестеге сәйкес жүргізіліп келеді. Барлық бағытта жөндеу және алдын алу жұмыстары аяқталып, қоймалар мен техникалық базалар толық жабдықталған.

— Негізгі мақсатымыз қар мен боран кезінде көлік қозғалысының қауіпсіздігін және үздіксіз өтуін қамтамасыз ету. Әрбір учаске тәулік бойы бақылауда болады, — дейді филиал өкілдері.

Фото: «ҚазАвтоЖол» АҚ Қарағанды обоыстық филиалы

Мамандардың айтуынша, дайындық шаралары мамыр айынан басталған. Осы уақыт ішінде жол жиегін тегістеу, шұңқырларды жамау, бұталарды кесу және шөп шабу жұмыстары жүргізілген. Бұл шаралар боран кезінде жолдың қар басып қалуына жол бермейді. Сонымен қатар, қоршаулар жөнделіп, су өткізу құбырлары мен шағын көпірлер тексерілді.

Техника мен материалдар толық дайын

Қазір 158 арнайы техниканың 152-сі, яғни 96 пайызы сапта тұр. Олардың қатарында 88 біріктірілген қар тазалау көлігі, 14 автогрейдер, 30 трактор және 12 тиегіш бар. Сонымен бірге, күрделі учаскелер үшін бульдозерлер мен қар тазалайтын шнекороторлар әзірленген.

Фото: «ҚазАвтоЖол» АҚ Қарағанды обоыстық филиалы

Қоймаларда 16,7 мың текше метр ұнтақ тас (жоспардағы 22 мыңнан), 2,2 мың тонна тұз (3,2 мыңнан) және 465 тонна көмір жиналған. Барлық жеткізу келісімшарты жасалып, материалдар жоспарлы түрде жеткізіліп отыр.

— Қар жауып, көктайғақ болса толық дайынбыз. Қатты боран немесе аяз кезінде тәулік бойғы кезекшілік пен техника жедел түрде жолға шығарылады, — деді «ҚазАвтоЖол» Қарағанды филиалының мамандары.

1885 шақырым жол тәулік бойы бақылауда

Қыс мезгілінде облыс бойынша республикалық маңызы бар 1885 шақырым жол қардан тазартылады. Ерекше назар Астана–Қарағанды, Қарағанды–Балқаш және Қарағанды–Қарқаралы бағыттарына, сондай-ақ бедері күрделі, қар жиі үйілетін учаскелерге аударылады.

Фото: «ҚазАвтоЖол» АҚ Қарағанды обоыстық филиалы

Бұл учаскелерде ұзындығы 143,7 мың метр тұрақты қар тоқтатқыш қоршаулар орнатылған. Қосымша 11,5 мың метр уақытша ағаш қалқандар қойылады. Ал Қарағанды–Балқаш трассасының жаңартылған бөлігінде 95 мың метр бетонды қар ұстау жүйесі іске қосылып, боран кезінде жолдың өткізу қабілеті артқан.

Цифрлы бақылау мен жаңа техника

Жолдарды тазалау тиімділігін арттыру үшін құм мен тұздың оңтайлы қоспасы пайдаланылады. Ақылы учаскелерде орнатылған бейнебақылау жүйелері жолдағы жағдайды нақты уақыт режимінде бақылап, техниканы қажет бағытқа жедел жібереді.

Фото: «ҚазАвтоЖол» АҚ Қарағанды обоыстық филиалы

Барлық жұмыс жедел штабтың қадағалауында. Дабылды ескерту түскен жағдайда жол қызметтері Төтенше жағдайлар департаменті, полиция және «Қазгидрометпен» бірлесіп әрекет етеді. Ал қозғалыс шектеу немесе жол жабылуы туралы ақпарат «ҚазАвтоЖолдың» ресми арналары мен Telegram-каналдарында және жол бойындағы ақпараттық таблоларда жарияланады.

Жүргізушілер тәулік бойы 1403 байланыс орталығына хабарласа алады.

Фото: «ҚазАвтоЖол» АҚ Қарағанды обоыстық филиалы

Жаңа бөлімшелер мен автопарк жаңғыруы

Бүгінде облыс аумағында сегіз жол пайдалану учаскесі жұмыс істейді. Жақын арада тағы үш бөлімше — Жұмабек, Ақшатау және Сарышаған елді мекендерінде ашылады. Бұл боран кезінде жол қызметінің әрекет ету жылдамдығын арттырып, жол күтімінің сапасын жақсартады.

Биыл автопарк 40 жол тазалау техникасы, 7 Lovol тракторы, 9 «Газель» және 7 пикаппен толықты. Бұл жаңарту әсіресе шалғайдағы учаскелердің жұмыс тиімділігін арттырған.

— Біз техниканы жаңартып, жол күтіміне заманауи әдістер енгізуді жалғастырып келеміз. Қыс қаншалықты қатал болса да, басты мақсатымыз — әр трассаның қауіпсіз және ашық болуын қамтамасыз ету, — дейді филиал өкілдері.

Мамандардың айтуынша, Қарағанды өңірінде боран, көктайғақ пен қатты жел жиі болып тұратын табиғи құбылыс. Сондықтан мұндай учаскелерде қар тоқтату және жолдарды бақылау шаралары күшейтілген. Ең бастысы — жүргізушілердің қауіпсіздігі мен жол қозғалысының үздіксіздігін сақтау.

Еске салсақ, Солтүстік Қазақстан облысында өңірлік маңызы бар жолдарды қыста күтіп ұстауға биыл 1,5 млрд теңгеге жуық қаржы бөлінгені жайлы хабарлаған болатынбыз.