Әкім 11 мың теңгеге бәс тіккені үшін жұмыстан шығарылды: ол сот шешіміне шағымдануда

Қарағанды облысында Бахты ауылдық округінің әкімі Серікболсын Бәли оның атынан букмекерлік платформада жалпы сомасы 11 мың теңгеге екі бәс тігілгеннен кейін қызметінен айырылды. Экс-шенеуніктің өзі бәс тікпегенін, ал тіркелген аккаунт оған тиесілі емес екенін алға тартқан. Ол жұмыстан шығару туралы шешімге сотта шағымданғанымен, талап арызы қанағаттандырылмады, деп хабарлайды Tengrinews.kz тілшісі.

Бәс тігілді

Оқиға прокуратура тексерісінен басталған. Қарқаралы ауданы әкімдігінің мәліметінше, 2026 жылғы 11 наурызда қадағалау органы сыбайлас жемқорлыққа қарсы шектеулердің бұзылғанын анықтаған.
Прокуратура ұсынысында 2025 жылғы 10 тамызда Серікболсын Бәлидің атынан букмекерлік платформалардың бірінде 10 мың және бір мың теңге көлемінде екі бәс тігілгені анықталды.

Мемлекеттік қызметші үшін бұл жұмыстан шығаруға негіз болды. 2024 жылғы қыркүйектен бастап мемлекеттік қызметшілердің құмар ойындар мен бәс тігуге қатысуына заңнамамен тыйым салынған.

Прокуратура ұсынысынан кейін әкімге қатысты қызметтік тергеу тағайындалды. Материалдарды тәртіптік комиссия қарап, Бәлидің белгіленген сыбайлас жемқорлыққа қарсы шектеулерді бұзғаны туралы қорытындыға келді. 2026 жылғы 9 маусымда ол тиісті бап бойынша мемлекеттік қызметтен босатылды. Бірақ экс-әкім бұл шешіммен келіспей, сотқа жүгінді.

Экс-әкімнің басты уәжі — букмекерлік кеңседегі аккаунтты ол тіркемеген. Серікболсын Бәлидің айтуынша, тіркелу кезінде көрсетілген телефон нөмірі оған тиесілі емес. Сонымен қатар ол тексеру барысында аккаунтты нақты кім қолданып, бәс тіккені анықталмаған деп есептейді.

"Бәсті расымен менің тіккенімді дәлелдейтін нақты деректер анықталған жоқ. Соған қарамастан мені жұмыстан шығарды. Атап айтқанда, онлайн платформада аккаунт тіркелген нөмірдің кімге тиесілі екені, бәс тігілген IP-мекенжай мен геолокация тексерілмеді", - деді Серікболсын Бәли Tengrinews.kz тілшісіне берген сұхбатында.

Қарқаралы ауданы әкімдігінің ақпараты бойынша, букмекерлік компания өкілі сотта пайдаланушыны тіркеу кезінде қажетті дербес және биометриялық деректер жиналатынын мәлімдеген. Сонымен қатар, тіркелу пайдаланушының фотосуретін жеке куәліктегі азаматтың фотосуретімен сәйкестендіргеннен кейін ғана жүзеге асады.

Алайда Бәли бұл дәлелдермен де келіспейді.

"Биометрияның 2026 жылдан бастап енгізілгенін мен тек соттан кейін білдім. Ал менің атымнан бәс 2025 жылы тігілген. Оның үстіне, букмекерлік компания маған верификациядан өткенім туралы видеоны көрсете алмады. Бірақ сот бұған мән бермей, мені жұмысқа қайта орналастыруға негіз таппады", - дейді экс-әкім.

2026 жылғы 21 қыркүйекте сот Бәлидің талап арызын қанағаттандырудан бас тартты. Бұрынғы әкім мемлекеттік қызметті тоқтату туралы шешімді заңсыз деп тануды, оны Бақты ауылдық округінің әкімі лауазымына қайта тағайындауды және мәжбүрлі бос жүрген уақыты үшін жалақысын өндіріп беруді сұрады. Сот белгіленген сыбайлас жемқорлыққа қарсы шектеулерді бұзу фактісі расталды деген қорытындыға келді.

Мемлекеттік қызмет істері агенттігінің Қарағанды облысы бойынша департаменті де мемлекеттік қызметшілердің құмар ойындарға қатысуына "Сыбайлас жемқорлыққа қарсы іс-қимыл туралы" заңның 12-бабы 1-тармағының 6-тармақшасы бойынша тыйым салынғанын хабарлады. Бұл шектеулерді сақтамау мемлекеттік қызметті тоқтатуға негіз болады.

Серікболсын Бәли істі апелляциялық сатыда қарауға қол жеткізбек және өзі үшін ешқандай артықшылық сұрамайтынын айтады.

"Мен әділдікті талап етемін. Ешқандай бәс тіккен жоқпын. Кімде-кім букмекерлік сайтқа тіркелу кезінде менің жеке куәлігімді пайдаланған. Бұны түсіндіру оңай, өйткені біз жеке куәлікті әртүрлі инстанцияларға жиі жібереміз. Ал қалғандарының бәрі: нөмір, IP-мекенжай - маған тиесілі емес. Қазір цифрландыру заманы ғой, мұны тексеру оңай. Сонымен қатар менің банк картамнан бәске ешқандай ақша ұсталған жоқ", - деп мәлімдеді ол.

Серікболсын Бәли Бахты ауылдық округіне 2025 жылғы 20 наурызда жұмысқа келген. Оған сайлауға түсуге ауылдастары ұсыныс жасаған. Оған дейін ол Қарағандыда мұғалім болып жұмыс істеген. Әкім лауазымында ол бір жылдан сәл астам уақыт қызмет етті.

Еске сала кетейік, мемлекеттік қызметшілерге құмар ойындарға қатысуға тыйым салатын заң 2024 жылдың қыркүйегінде күшіне енді. Шектеуді сақтамаған жағдайда оларды жұмыстан шығару қарастырылған.

Бізді Google-дың негізгі дереккөздер тізіміне қосыңыз