Алатау қаласын салу кезінде Корея тәжірибесі қолданылады

«Ақылды» үйлер, жерасты қоқыс құбыры, жүргізушісіз көлік.

Осы және өзге де ноу-хауларды зерттеу үшін Қазақстан үкіметі мен парламент мәжілісінің өкілдері, кәсіпкерлер Оңтүстік Кореяға барды. Делегация Седжон және Сондо инновациялық қалаларында болып, корей тәжірибесін Алатау қаласын салу кезінде қолдану жағын зерделеді.

Бұл Оңтүстік Кореяның әкімшілік астанасы Седжон қаласы. "Ақылды шаһар" құрылысы 2007 жылы басталған. Қазір мұнда Сеулден елдің көптеген министрліктері мен мекемелері көшірілген. 14 мың мемлекеттік қызметкер үшін қаланы тартымды ету мақсатында ең заманауи технологиялар енгізілді. Сол ноу-хаулар Қазақстаннан келген делегацияға көрсетілді.

Владислав Цой, тілші :

- Қазақстандық делегацияны Седжон қаласындағы қоқыс жинау және қайта өңдеу тәжірибесі қызықтырды. Мұнда қалдықтар біздегідей қоқыс жәшіктеріне салынады. Біріншісі - тұрмыстық қалдықтарға, екіншісі - тағам қалдықтарына, ал үшіншісі көлемі 100 литрден асатын ірі қоқыстарға арналған. Алайда корей смарт-ситиде қоқыс таситын көліктер жоқ. Барлық қалдықтар қоқыс өңдеу зауытына ауа қысымының көмегімен жерасты құбырлары арқылы жеткізіледі.

Депутаттардың айтуынша, «ақылды» басқару мәселесінде Қазақстан Оңтүстік Кореядан қалыс қалып отырған жоқ. Тіпті кейбір тұстарда алда келеді.

Екатерина Смышляева, ҚР Парламенті Мәжілісінің депутаты:

- Бұл өте жағымды жайт. Себебі бізде көптеген цифрлық шешімдер жақсы жолға қойылған әрі көп уақыттан бері жұмыс істеп келеді. Сонымен қатар, қазір заңнамада цифрлық қатынастарды реттейтін кодекс бар. Ал жасанды интеллект туралы заңымыз Оңтүстік Корея нұсқасынан төрт күн бұрын күшіне енеді.

Корея тәжірибесін зерттеу «Алатау қаласының ерекше мәртебесі туралы» конституциялық заңды қабылдауға көмектеседі, дейді мәжілісмендер. Құжат Парламентке жөнелтілген. Онда қала басшылығына ерекше өкілеттіктер беретін нормалар қарастырылған.

Абзал Құспан, ҚР Парламенті Мәжілісінің депутаты:

- Бүкіл шешім «Алатау Сити» дирекциясының деңгейінде шешіледі. Яғни лицензия алу үшін бір министрлікке барып, жер алу үшін сол облыстың әкімшілігіне барып жүрмейді. Барлығы инвесторларға қолайлы «бір терезе» қағидасымен жұмыс жасайтын болады. Яғни инвестор ең бастысы қызығушылық танытқан және өзіне сенімді инвестор келеді, бір ғана жерден барлық шаруасын бітіреді де құрылысқа ма болса құрылысқа, цифрландыру ма, кім қандай жобамен келеді, сол жобаға кірісіп кететін болады.

Алатау-ситидің жобасы Оңтүстік Кореяда үш ай бұрын таныстырылған. Қазір жаңа шаһар құрылысының басталуын күтіп жүрген инвесторлар көп. 

Пак Мун Гу, KPMG Korea серіктесі:

- Қазір Шымкентте бу-газ электр станциясы жобасымен айналысып жатқан Дусан компаниясы Алатау қаласында 14 жаңа электр станциясын салуға қызығушылық танытып отыр. Жалпы келіссөз жүргізіп жатқан компаниялардың саны 30-дан асады. Биыл кореялық бірлестіктермен көп келісім-шарт жасайтын жыл болады деп сенемін.

Алатау қаласын салу бойынша Қазақстан-корей ынтымақтастығына президент Қасым-Жомарт Тоқаевтың Сеулге сапары тың серпін беретіні анық. Биыл қыркүйек айында мемлекет басшысының «Корея - Орталық Азия» саммитіне қатысуы жоспарланған.

Владислав Цой, Ольга Лян