ЕАЭО ның ортақ биржа нарығын құру кезінде Өзбекстанның тәжірибесі қолданылады

АСТАНА, 20 қазан — Sputnik. Еуразиялық экономикалық комиссияның (ЕЭК) бәсекелестік және монополияға қарсы реттеу министрі Максим Ермолович Өзбекстанның республикалық тауар-шикізат биржасы басқарма төрағасының орынбасары Набих Саматовпен жұмыс кездесуін өткізді.

Тараптар ЕАЭО-ға мүше мемлекеттердің өкілдері мен ирандық бақылаушылар кіретін Биржа комитетіне Өзбекстан өкілдерін қатыстыру туралы келісті.

"Өзбекстан тауар-шикізат биржасының өкілдерін бақылаушылар ретінде шақыру, сондай-ақ олардың биржа моделін іске қосу тәжірибесін пайдалану ЕАЭО шеңберінде ортақ биржа нарығының қағидаттарын әзірлеудің бастапқы кезеңіне серпін береді", - деп атап өтті Максим Ермолович.

Сондай-ақ Набихон Саматов пен Максим Ермолович ЕАЭО аясындағы биржа саудасы саласындағы ынтымақтастық пен озық тәжірибені алмасу мәселелерін талқылады.

Бұған дейін Еуразиялық экономикалық комиссия (ЕЭК) хабарлағандай, ЕАЭО аясында 2030 жылға қарай ортақ тауар биржа нарығы жұмыс істейді. Комиссия бұл бағыттағы жұмысты бастап та кетті.