Алдағы күндері Жерге магниттік дауыл соғады

Жерге Күнде болып жатқан процестерден туындаған магниттік дауылдар толқыны жақындауы мүмкін. 

Күн астрономиясы зертханасының мәліметінше, Жерге қарай Күннен шығатын жылдам күн желінің ағыны жақындап келеді. Ол Күндегі ірі короналық тесікте (тәждік тесік) қалыптасқан. Оның әсері бірнеше күнге созылуы мүмкін геомагниттік тұрақсыздыққа әкеледі.

Ғалымдар бұл короналық тесіктің Күн бетінде бірнеше ай бойы байқалып келе жатқанын және шамамен әр 27 күн сайын Жердің әсер ету аймағына қайта оралатынын айтады. Бұл — Күннің өз осінен толық бір айналым жасау уақыты.

Жалпы алғанда, Жер күн желінің ағынында шамамен бір апта болады. Алайда ең күшті әсер алғашқы екі тәулікте — сенбі мен жексенбіде күтіледі. Осы кезеңде Жердің геомагниттік өрісі жаңа сыртқы жағдайларға бейімделіп, барынша тұрақсыз күйде болады.

Болжам бойынша, дүйсенбіден бастап жағдай біртіндеп тұрақтала бастайды. Жердің магнит өрісі қоршаған ортамен тепе-теңдікке келеді, ал дауылдың белсенді фазасы аяқталады.

Тұтастай алғанда, ағымдағы жыл геомагниттік жағдайлар тұрғысынан күрделі болып қала береді. Алғашқы 100 күн ішінде магниттік дауылдар 24 күн бойы тіркелді, бұзылулар әрбір төртінші күнде орын алды. 

Мамандардың болжауынша, жоғары геомагниттік белсенділік кем дегенде жыл соңына дейін сақталуы мүмкін және келесі жылдың алғашқы айларында қайталануы ықтимал. Одан кейін Күн минимумы жақындаған сайын белсенділік төмендей бастайды.

Еске салайық, магниттік дауылдардың адамға әсері жөнінде ғалымдар арасында бірыңғай пікір жоқ. Дегенмен медицинада олардың кейбір адамдардың жағдайына әсер етуі мүмкін екені айтылады. Мәселен, қан қысымының көтерілуі, бас ауруы, жұмысқа қабілеттіліктің төмендеуі, мазасыздық және созылмалы аурулардың (соның ішінде аллергияның) асқынуы мүмкін.

Бұған дейін наурызда соңғы екі айдағы ең күшті магниттік дауыл аяқталған болатын.