Әлем ауаның ластануына алаңдаулы

Әлем халқының 99%-ы ауа сапасы қажетті нормадан төмен аймақтарда өмір сүреді. Жыл сайын жаһанда 8 миллионнан аса адам ауадағы зиянды заттардың әсерінен туындайтын аурулардан көз жұмады. Бұл көрсеткіш әсіресе өндірісі дамыған және халқы тығыз орналасқан мегаполистерде барған сайын артып келеді. Дүниежүзілік денсаулық сақтау ұйымы өкіледрі осылай дейді. Көптеген мемлекет мәселені шешу үшін ауа сапасын жақсарту бағытында түрлі шаралар қабылдап жатыр. 

Пәкістан бүгінде әлемдегі ауа сапасы ең нашар елдердің бірі ретінде танылып отыр. Ең ластанған қалалардың қатарында Лахор, Карачи және Пешавар бар. Оның басты себептері - кірпіш зауыттары, көліктерден шығатын зиянды газдар, егістік алқаптардағы қалдықтарды өртеу және құрылыс шаңы. Осыған байланысты жергілікті тұрғындар арасында демікпе, өкпе аурулары мен жүрек-қан тамырлары аурулары көбейген. Үкімет белгілі бір маусымда көлік қозғалысын шектеу мен зауыттарға уақытша тыйым салу сияқты шаралар қабылдағанымен, бұл қысқамерзімді шара болғандықтан нәтиже бермей отыр.

Үндістан үшін лас ауа қалыпты құбылыс. Бұл мемлекет әлемдік антирейтингте үнемі алдыңғы орындарда тұрады. Елдегі көп қаласында ауа сапасы үнемі қауіпті деңгейден түспей, халықтың денсаулығына көп зиян келтіріп отыр. Дели әлемде ауасы ең лас шаһардың бірі. Ел билігі ауа сапасын жақсарту үшін жасыл аймақтарды кеңейту, электр көліктерін дамыту және зауыт шығарындыларды азайту секілді бастамаларды қолға алған. Дегенмен, халықтың тығыздығы мен урбанизация бұл бастамалардың әсерін шектеп отыр. 

Бангладеш соңғы бірнеше жыл бойы әлемдегі ауа сапасы ең нашар елдердің қатарында. Ең күрделі ахуал ел астанасы Даккада байқалады. Халқы тығыз шоғырланған бұл шаһарда көліктердің түтіні, генераторлар, өнеркәсіп кәсіпорындары мен құрылыс жұмыстары ауаны басты ластау көздері саналады. Жергілікті билік экологиялық мәселелерді шешуге талпыныс жасағанымен, қаржы тапшылығы мен қадағалау жүйесінің әлсіздігі қиындық туғызып отыр. Елде табиғатты қорғауға бағытталған заң қабылданған, бірақ тиісті деңгейде жүзеге аспай келеді. Салдарынан балалар мен егде жастағы азаматтар арасында тыныс алу жүйесіне қатысты аурулар мен аллергиялық сырқаттар жиілеген. Мәселені шешу үшін халықаралық ұйымдармен ауаны бақылау және зерттеуді жақсарту шаралары қолға алына бастаған.