Қара қар ауаның шынайы күйін көрсетеді

Елде ластаушы заттар шығындыларының шекті көлемі 4 миллион тоннаға жуықтайды. Олардың басым бөлігін шамамен 60 пайызын 50 ірі өнеркәсіптік нысандар шығарады. Әрқайсысына шектеу болса да заңнаманы елемейтіндер көп. Алпауыт кәсіпорындардың шығындылары арнайы автоматтандырылған жүйе арқылы бақылануы керек. Алайда мониторингке қажетті жаңа технологияны әлі ешбір кәсіпорын орнатпаған. Мәжіліс депутаттары осылай деп экологияны сақтап қалу үшін дабыл қағып отыр. 

Сергей Пономарев, ҚР Парламенті Мәжілісінің депутаты:

- Теміртаудағы Қарметтің жайы көңіл көншітпейді. Оларда арнайы технология жоқ. Құбырларында фильтр орнатылмаған. «Қазақмыс»-тың жағдайы да мүшкіл. Тіпті Сәтбаев, Жезқазған және Балқаш қалаларының тұрғындары «көмірдей қара қар» жауатын экологиялық мәселенің куәсі болып жүр. Яғни ақ ұлпа қар, дәл осы қалаларда сұр әрі қара түске боялып, шаһардағы ауаның шынайы күйін көрсетеді. Бұл ахуал расымен алаңдатып отыр.

Ғаламшарда әр 10 адамның 9-ы лас ауамен тыныс алады. Өз еліміздегі көрсеткіштер де қөңілді қынжылтады. Сарапшылар: «Түтінге тұншығып тұрған қалалардың барын мойындаумыз қажет», - дейді.

Жұлдыз Сәулебекова, «Almaty Air Initiative» қорының атқарушы директоры:

- Теміртау моно-қаласын алсақ. Онда ауаны ластайтын шығындылардың 80 пайызы бұрынғы Арселор Митталға тиесілі. Ал Өскеменде Казцинк секілді кәсіпорны бар. Бұған қоса, қалада көмірмен жұмыс істейтін Жылу электр орталығы жұмыс істеп тұр. Бұл нысандар шаһардағы ауаның ластануына жол береді. Қазір барлық тиісті ғимаратты модернизациядан өткізу керек. Себебі тұрғындардың денсаулығына қауіп төніп тұр.