Атырау Арена : 1500 орындық спорт кешені салынуда

Атырау облысында 1500 орындық «Атырау Арена» спорт кешенінің құрылысы ресми түрде басталды.

Көпфункционалды нысан халықаралық стандарттарға сай салынып, «Нұрсая» шағынауданында 4,6 гектар аумақта бой көтермек. Іргетасқа уақыт капсуласын салу рәсіміне облыс әкімі Серік Шәпкенов, спорт басқармасының өкілдері, ардагерлер мен спортшылар қатысты.

Әкімнің айтуынша, жаңа кешен Мемлекет басшысының бұқаралық спортты дамыту және заманауи инфрақұрылым қалыптастыру жөніндегі тапсырмалары аясында жүзеге асуда. Қазір өңірде спорттық инфрақұрылыммен қамту деңгейі 71 пайызға жеткен. Былтыр сегіз спорт кешені пайдалануға берілсе, биыл тағы 22 нысан ашу жоспарланған. «Атырау Аренада» 20 олимпиадалық спорт түрімен айналысуға мүмкіндік болады.

Жоба EPC келісімшарты негізінде «Әлем құрылыс» ЖШС тарапынан іске асырылуда. Компания жобалаудан бастап пайдалануға берілгенге дейінгі толық жұмыс цикліне жауапты. Құрылысқа 400-ге жуық жұмысшы мен 20 техника жұмылдырылған. Жоспар бойынша кешен 2027 жылдың қарашасында аяқталады.

Нысанда футбол, волейбол, баскетбол, жүзу, бокс, күрес, семсерлесу, триатлон және өзге спорт түрлеріне арналған бөлімдер ашылады. Сонымен қатар жасанды өрмелеу қабырғасы салынып, халықаралық деңгейдегі жарыстарға арналған 5000 шаршы метрлік әмбебап спорт залы болады.

Кешен базасында оқу-жаттығу жиындары, республикалық және халықаралық жарыстар, сондай-ақ бұқаралық спорттық және мәдени іс-шаралар өткізу көзделген. Жаңа орталық екі мыңға жуық бала мен жасөспірімге тұрақты түрде спортпен айналысуға мүмкіндік беріп, облыстағы ең ірі спорт нысандарының біріне айналмақ.

Бүгін, 18:52