Астанада жаңа спорт кешені ашылды

Заманауи, сапалы әрі тегін.

Елордада жаңа денешынықтыру-сауықтыру кешені бой көтерді. Спорт нысаны Алматы ауданынан ашылып отыр. Ғимараттың тұсау кесу рәсіміне жиналғандар қарасы қалың болды.

Железнодорожный тұрғын алабында 3 мәселе бір мезетте шешілді. Жас пен жасамыстың сағына күткен спорт кешені ашылды. Оған жапсарлас полиция пункті мен халыққа қызмет көрсету орталығы да жұмыс істейді. Бұл 13 мыңдай тұрғыны бар елді мекен үшін елеулі жаңалық. 

Бахарам Құсайынова, қала тұрғыны:

- Армандап жүр едік, бізге дене шынықтыру балаларға да, үлкен кісілерге де өте қажет еді. Бүгін қуанып отырмыз. Көп зейнеткерлер, үлкен кісілер енді қалаға бара бермейді ғой. Бір емес, екі автобуспен бар керек. 

Енді тұрғындар қала орталығына қатынап, табанынан тозбайды. Қалауының бәрі бір қадам жерде. Әсіресе егде кісілерге ермек табылды. Үйден шығып, серпілуге үстел теннисі себеп. Ол аз десеңіз, ұзақ өмір сүруге, денсаулықты түзеуге арналған үйірме де бар. Ал жасөспірімдер жағы олимпиадалық спорт түрлері бойынша жаттығады. 

Мұхамед Ибраев, №3 Олимпиада резерві мамандырылған балалар мен жасөспірімдер спорт мектебінің басшысы:

- Біздің жасөспірімдер 5 спорт түрінен, бокс, дзюдо, грек рим, таеквондо болады. Барлық түрі тегін. Спорт кешенінен Олимпиада, әлем чемпиондарын күтеміз. 

Спорт – саулық кепілі. Сондықтан жастардың шынығып шымыр жүруі шыңға шығуына да үлкен сеп. Жалпы халықтың сұранысына қарай әлеуметтік және спорт нысандары салынып жатыр. 

Нысаналы Ығыл, Ғалымжан Әбділахат