Түркістан облысында спорт кешені мен мәдениет үйі ашылды

Жаңа жыл қарсаңында Түркістан облысында бірнеше спорттық және әлеуметтік нысан ашылды.

Жетісай ауданы Асықата кентінде заманауи үстел теннисі орталығы пайдалануға берілді. Ал Түлкібас ауданы Дәубаба ауылында мәдениет үйі тапсырылды. Бұл халықтың әл-ауқатын көтеріп, тұрмысын жақсарту мақсатында жасалып жатқан игі шаралар, - дейді жуаптылар.

Асықата кентінде бой көтерген үстел теннисі орталығы заманауи үлгіде  жабдықталған. Нысан бір мезетте 200 баланы қамтиды. Мұнда тенниспен бірге бокс жене  күрестің  түрлерімен шұғылдануға болады. Орталықтың ашылуына еліміздің үстел теннисі федерациясының вице-президенті Елсияр Қанағатов қатысып, жаңа нысан Жетісай ауданының спорттық әлеуетін жаңа деңгейге көтеретініне сенім білдірді.

Елсияр Қанағатов, ҚР Үстел теннисі федерациясының вице-президенті:

- Біздің 70-80 пайыз даңқты спортшыларымыз ауылдан шыққан. Ауыл спортын көтермей қазақ спорты дамымайды. Сондықтан мына кешенде барлық жағдай жасалған. Бұл жерде жаттығуға болады, жататын орындары бар. Тамақтанатын жері бар. Ауданның, облыстың үстел теннисшілері келіп, оқу-жаттығу жұмыстарын жүргізуге болады. Шын жүректен құттықтаймыз.

Ал Дәубаба ауылында ел игілігіне берілген мәдениет үйінде 100 орынға арналған көрермен залы мен заманауи талапқа  сай жабдықталған кітапхана бар. Жоба құны – 247 млн теңге. Мәдениет үйінің ашылуына облыс әкімі Нұралхан Көшеров қатысып, жаңа нысан ауыл тұрғындарының мәдени өмірін жандандырып, өнерлерін шыңдауға жол ашатынын атап өтті.

Санғали Нұралиев, Дәубаба ауылының имамы:

- Шалғайда жатқан ауылымызды елеп-ескеріп, мәдениет үйін салып беріп жатқанына алғысымызды айтамыз. Ауылымызда жол жақсы, газымыз бар. Ауызсуымыз да бар. Көше шамдары жанып тұр. Осы Дәубаба ауылы атынан сіздерге алғыс білдіремін.

Биыл облыс көлемінде 112 спорт нысанның құрылысы басталып, 102-сі тапсырылды. 16 мәдениет үйі бой көтеріп, оның 6-ы пайдалануға берілді.

Авторлары: Жандос Жұмабек, Ерболат Әбіш