Көкпекті ауылында Мәдениет үйі ашылды

Қарағанды облысының Көкпекті ауылында Мәдениет үйі ашылды. Нысан «Ауыл - ел бесігі» бағдарламасы аясында салынды.

Мәдениет ошағы енді ауыл тұрғындары үшін шығармашылық пен өнердің жаңа орталығы болады.

Көкпекті ауылының тұрғындарына заманауи әрі кең ғимарат салынды. Ауылдықтар 30 жыл бойы шығармашылық үйірмелерге бейімделген тар бөлмелерде отыратын. Сондықтан жаңа Мәдениет үйінің ашылуы - жұрт үшін Жаңа жыл алдындағы ерекше қуаныш.

Қазанбай Әубәкіров, Көкпекті ауылының тұрғыны:

- Бұрын біз мынандай тар жерде тығылып отырушы едік. Енді мынадай кең, жарық Мәдениет үйімізге қуанып жатқан жайымыз бар. Музыкалық жетекшінің бөлмесі, клуб меңгерушісінің бөлмесінде барлығы бар.

Ауылда бүгінде «Бірлік» және «Атамекен» ұжымдары жұмыс істейді, сондай-ақ балалардың вокалдық және би ансамбльдері бар. Жаңа Мәдениет үйінде домбыра мен қобыздан сабақтар, бұдан бөлек дойбы және шахмат секциялары ұйымдастырылады. Ғимаратта 200 орындық көрермен залы, кең сахна және үйірмелерге арналған кабинеттер қарастырылған.

Ольга Гайнуллина, Мәдениет үйінің меңгерушісі:

- Жаңадан үйірмелер ашуға мүмкіндік туып отыр. Тіпті жеке гримдеу бөлмелері де бар. Ауылға гастрольмен өнер ұжымдары келсе, бұл өте ыңғайлы. Өнерпаздардың дайындалуына арналған кең бөлме де қарастырылған.

2025 жылы Бұқар жырау ауданында үш жаңа Мәдениет үйі салынды. Тағы жеті мәдени нысанға күрделі жөндеу жүргізілді. Биыл облыс бойынша құрылыс қарқыны жоғары болды. «Келешек мектептері» жобасы аясында төрт заманауи мектеп бой көтерді. Бұл нысандар балалардың білім алуы, шығармашылықпен айналысуы және жан-жақты дамуына жаңа мүмкіндік береді.

Абылай  Смағұлов,  Құрылыс, сәулет және қала құрылысы басқармасы басшысының орынбасары:

- Бұл - Шет ауданында екі мектеп, Бұқар жырау ауданында бір мектеп және Қарағанды қаласында бір мектеп. Сонымен қатар биыл Қарқаралы ауданы Қасым Аманжолов ауылында мектеп құрылысы аяқталды.

Денсаулық сақтау саласы да назардан тыс қалмады. Биыл өңір ауылдарында 66 фельдшерлік-акушерлік пункт пен дәрігерлік амбулатория салынды. Балқашта заманауи жабдықталған операциялық блок жақын күндері ашылады. Қарағандыда онкологиялық ауруханаға қосымша корпус құрылысы аяқталуға жақын. Спорт инфрақұрылымы да дамып келеді. Приозерск қаласында және Көктас ауылында жаңа дене шынықтыру-сауықтыру кешендері жұмысын бастады.

Авторлары: Руслан Нұрланұлы, Сайлау Игіліков, Аман Хамит