Қазақстандықтар қауіпті вирустың таралып жатқанына алаңдаулы

Қараша басталғалы қазақстандықтар қауіпті вирустың таралуына алаңдаулы.

Желіге жарыса салып, жазба арнап жатқандардың көбі түсініксіз жұқпа екенін айтып шағымданады. Сөздерінше, дене қызуы 40-тан түспей, талайын әбігерге салған көрінеді. Қыс басталмай жатып, халықты қалтыратқан бұл қандай індет? Әлде ЖРВИ-нің әдеттегі маусымдық өсуі ме?

Тұмаумен күресіп жатқан көптің бірі Ләззат Мұқанова. Бойын басқан әлсіздік пен жоғары дене қызуына қарамастан астаналық тұрғын қабылдауға келді. Аурумен арпалысып жатқанына бүгін үшінші күн. Алғашында үйде дәрі қабылдап, аяққа тұрып кетем деп ойлапты.

Алайда жөтел басталып, індет дес бермеген соң мамандар көмегіне жүгінуге тура келген.

Ләззат Мұқанова, қала тұрғыны:

- Биыл ерте басталған сияқты тұмау. Менің өзім үшінші күн ауырып келдім. Сондай дел-сал, денем шаршап қалатын. Мұрнымнан тоқтаусыз су ағып, кешке жақын дене қызуым көтерілді. Дәріханадан дәрі алып ішіп көрдім.

Эпидемиологиялық маусым басталғалы бұл емханада күні-түні қарбалас. Басы ауырып, балтыры сыздап келетін науқастардың саны да екі есе өсіпті. Жіті респираторлық вирустық инфекцияның 1300 жағдайы тіркелген. Десе де, дәрігерлер дабыл қағуға негіз жоқ деп отыр. Себебі, вирус жыл сайын дәл осы кезеңде күшейетін көрінеді. Сондықтан, алдымен өзім елделемге баспай, бірден дәрігерге жүгіну керектігін ескертеді.

Әділбек Тұрсынқұлов, терапевт - дәрігер:

- Гриптің таралуы қазір жоғары болып саналады. Неге екені өйткені, қоршаған орта әсері бізде жаңағы погода салқын. Адам иммунитеті инфекцияға әлсіз болып табылады. Қазіргі таңда күніне 18-20 адам келіп жатыр. Шағымдардың барлығы тамақ ауруы, температура, мұрын бітелуі.

Дәрігерлер әдетте тұмаудың күрт өршитін кезеңі желтоқсанның аяғы мен қаңтардың басы деп болжайды. Бірақ биыл жұқпалы вирус әдеттегіден ертер оянған сияқты. Қазан айынан бастап халықты әбігерге сала бастаған.

Ақбаян Арапшаева, Астана қалалық қоғамдық денсаулық сақтау басқармасының баспасөз хатшысы: 

- Қала ауруханаларында тұмаумен ауыратын науқастарға 4000-нан астам орын дайындалған. Науқастар саны артқан жағдай қосымша орындар қарастырылады. Астана қалалық қоғамдық денсаулық сақтау басқармасы тұрғындарды тұмау белгілері пайда болған кезде бірден емханаға келуге кеңес береді. 

Соңғы 2 айда елде 1 миллионнан аса адам тұмаумен ауырған. Министрлік қазір елдегі эпид ахуал тұрақты деп отыр. Десе де, дәрігерлер азаматтарға денсаулыққа мұқият болуға кеңес береді. Қауіпті вирус жоғары температураның кенеттен пайда болуымен, құрғақ жөтелмен басталатын көрінеді. Артынша емі аптаға созылады. Сондықтан аурудың алдын алған жөн. Сақтансақ сақтайды деген.

Кәмшат Мұхамеджан, Асхат Қарақойшиев