Әлемдік мұнай бағасы қарқынды өсіп жатыр

АҚШ пен Иран арасындағы келіссөздердің тығырыққа тірелуі фонында әлемдік мұнай бағасы күрт өсті. Brent маркалы мұнайдың құны барреліне 90 доллардан асты, деп хабарлайды Tengrinews.kz.

Астана уақыты бойынша сағат 08:15-тегі жағдай бойынша, Лондонның ICE биржасында Brent маркалы мұнайдың қазан айындағы фьючерстері 3,27 пайызға өсіп, барреліне 91,42 долларға жетті.

ice.com сайтынан скриншот

Америкалық WTI мұнайының қыркүйектегі фьючерстері 3,32 пайызға қымбаттап, барреліне 85,14 долларды құрады.

ice.com сайтынан скриншот

Бағаның өсуі, ең алдымен, АҚШ пен Иран арасындағы уағдаластықтарды жалғастыру перспективаларының нашарлауына байланысты. Өзара түсіністік туралы 60 күндік меморандумның мерзімі 17 тамызда аяқталды, алайда тараптар оны ұзарта алмады.

АҚШ президенті Дональд Трамп Вашингтонның келісімді ұзартуға ниетті емес екенін мәлімдеп, Ираннан тізе бүгуді талап етті. Ол егер Оман келісімге қол жеткізуге кедергі келтіретін болса, бұл елге қарсы әскери іс-қимылдар жасауы мүмкін екенін айтып қорқытты. Осыған дейін Оман АҚШ пен Иран арасындағы келіссөздерде делдал болып келген еді.

Тегеран өз кезегінде, егер дипломатиялық талпыныстар нәтиже бермесе, анағұрлым қатаң әскери позицияға көшуге дайын екенін мәлімдеді. Сондай-ақ Иран билігі Ормуз бұғазы аймағында жағдайдың ушығуы мүмкін екенін ескертті.

Айта кетейік, бұған дейін мұнай-газ саласының сарапшысы Асқар Исмаилов келесі жайтты атап өткен болатын: мұнай бағасы бюджет кірісіне, Ұлттық қордың жағдайы және теңге бағамына әсер етеді. Мұнай нарығындағы тұрақсыздық экономика үшін тәуекелдерді күшейтеді. Бағаның күрт құбылуы инфляцияға, инвестициялық белсенділікке және қаржы нарықтарына әсер етеді. Мұнай кірістеріне тәуелділік елді сыртқы соққылар алдында осал етеді.

Бұл ретте 2026–2028 жылдарға арналған бюджетте базалық параметрлер бекітілген: мұнай бағасы барреліне 60 доллар деңгейінде және доллар бағамы 540 теңге. Экспорттық кірістер, әлеуметтік төлемдер және мемлекеттік шығыстар дәл осы бағдарлар негізінде есептеледі.

Google News арқылы жаңалықтарымызды қадағалаңыз