Әлеуметтік көмек беруде ЖИ қолданылады

Әлеуметтік көмекке мұқтаж жандарды жасанды интеллект анықтайды.

Бұл туралы Еңбек және халықты әлеуметтік қорғау вице-министрі Виктория Шегай мәлімдеді. Салаға тың технологиялар енгізу мәселелері Астанада өткен халықаралық форумда талқыланды. Жиын Әлеуметтік қорғау жүйесі қызметкерлерінің күніне орай ұйымдастырылды. Форумға орталық мемлекеттік органдардың, халықаралық ұйымдардың, әлеуметтік қорлардың өкілдері қатысты.  Іс шарада әлеуметтік қамсыздандыру жүйесінде жасанды интеллект қолдануға ерекше мән берілді.

Виктория Шегай, ҚР Еңбек және халықты әлеуметтік қорғау вице-министрі:

- Жасанды интеллект "Отбасының цифрлық картасы"  негізінде мемлекеттік қолдауға мұқтаж жанұяларды автоматты түрде анықтауы тиіс. Бұл әлеуметтік көмекпен айналысатын барлық мемлекеттік органдардың қызметіне қатысты.  Мәселен, аз қамтылған отбасыларға «Тұрғын үй көмегі» беріледі. Бүгінде оны алу үшін жергілікті басқарушы органдарға бару керек. Бірыңғай цифрлық платформа аясында осы көмекті тағайындауды автоманттандыруды жоспарлап отырмыз. Сонда жүйе әлеуметтік төлемге мұқтаж жандарды өзі анықтап, тиісті төлем тағайындайтын мекемелерге ақпарат жібереді.  

Гүлбағила Болатбекова, "Мемлекеттік әлеуметтік сақтандыру қоры" өкілі:

- Әлеуметтік кодекс аясында көптеген төлемдеріміз біздің айлық есептік көрсеткішке немесе ең төменгі күнкөріс деңгейі дейміз сондай азаматтарды жасанды интеллект өзі таңдап алып отырып, мұқтаж азаматтарды, соларға автоматты түрде тағайындау мәселелері қарастырылып жатыр. "Отбасының цифрлық картасы" дейміз. Сол кезде өңірлердегі күнкөріс деңгейі төмен, кедейшілікте тұрып жатқан азаматтардың жанұяларына қалай көмектесу керек ЖИ арқылы, қалай оларды анықтаймыз деген сұрақтар туындайды. Осы мәселе аясында кеңес өтіп жатыр.  

Үздік әлеуметтік жобалар анықталды

Халықаралық форум аясында "Әлеуметтік қорғау жүйесінің үздік қызметкері және үздік әлеуметтік жоба" республикалық конкурсының жеңімпаздарын марапатталды. Жиын мерекелік концертпен қорытындылады. Еске салайық, қазан айының соңғы жексенбісінде Қазақстанда Әлеуметтік қорғау жүйесі қызметкерлерінің күні атап өтіледі. Биыл мереке 26 қазанға тұспа-тұс келеді. 

Әйгерім Мұхтарқызы, әлеуметтік педагог /Қызылорда облысы/:

- Мүгедектігі бар балалардың түзету, дамыту жұмыстарымен біз дефектологтар, логопедтер, мұғалімдер, дене шынықтыру  мұғалімдері, музыка мұғалімдері барлығы балалардың коррекциялық жұмыстарын жүргізілуін қадағалаймын. Осы салаға келгеніме 7 жыл болды. Қазіргі балалардың жақсы болып дамуына біз зор үлесімізді қосудамыз. "Ең үздік әлеуметтік педагог болғаныма" мақтан тұтамын өзімді. Өте қатты қуаныштымын.