Алматы мектептерінде сенсорлық бөлме ашылды

Алматы мектептерінде сенсорлық бөлмелер жұмыс істей бастады. Бұл – оқушылар мен ұстаздарды қолдау және психологиялық жағынан сергітуге арналған. 

Инклюзивті білім беруде таптырмас көмекші саналады. Ерекше балаларға ғана емес, қалыпты дамып келе жатқан оқушыларға да пайдасы мол. Себебі оқу жүктемесі жоғары ортада балалар шаршайды, зейіні төмендейді. «Мұндайда сенсорлық үзіліс керек», - дейді мамандар.  Бөлмеде шаршауды басатын, жүйкені тыныштандыратын түрлі-түсті жарықтар орнатылған. Сонымен қатар қан айналымын жақсартатын бедерлі тақтайшалар, шар толы бассейн де бар. Бұл сенсорлық бөлмемен жабдықталған үшінші білім ошағы. «Бастама өзге мектептерде де жалғасады», - дейді жоба авторлары. АҚШ-тың мектеп, университеттерінде кеңінен қолданылатын әдіс алматылық ұстаздарға таныстырылды. 

Әсел Бектұрсынова, жоба авторы:
- Бірінші сенсорлық бөлмені екі жыл бұрын №65 мектепке,  екіншісін былтыр №191 мектепке жасадық. Олар негізінен бастауыш сынып оқушыларына арналған. Себебі балалардың моторикалық қабілетін арттыруға көмектеседі. Бұл жерде біз жоғары сынып оқушыларына да арналған құрылғылар қойдық. Яғни психологиялық жүктемені, шаршауды басатын заттар көп.

Сәкен Аралбаев, Қалалық Білім басқармасы басшысының орынбасары:

- Бүгінгі жобамыз – бюджеттің қаражатынсыз, демеушілер есебінен ашылып жатыр. Жоба өзінің өміршеңдігін көрсетті, соған байланысты пилоттық жоба ретінде жүзеге асып келген. Осы бағыттағы жұмыстарды жалғастырып, оқушыларымызға, соның ішінде инклюзивті бағытта оқып жатқан оқушыларымызға қолайлы жағдай болсын деген оймен осындай бөлмелер ашу жоспарымызда, ойымызда бар.