Алматы мен Астанада баспана бағасы қайта өсті

Қазақстанның тұрғын үй нарығында баға өсімі жалғасып жатыр.
2026 жылдың сәуір айындағы мәліметтерге сәйкес, әсіресе Алматы мен Астанада пәтер құны айтарлықтай қымбаттаған. Сарапшылар мұны ішкі көші-қон, инфляциялық қысым және құрылыс шығындарының артуымен байланыстырады.

Kursiv Media зерттеуіне сүйенсек, елдегі тұрғын үй нарығында қызық тенденция байқалған: қайта сату нарығындағы пәтерлердің орташа бағасы жаңа тұрғын үйлерден асып түскен. Қазақстан бойынша ескі пәтердің шаршы метрі орта есеппен 630 мың теңге болса, жаңа үйлерде бұл көрсеткіш 615 мың теңге шамасында қалыптасқан.

Бұл айырмашылық әсіресе Алматыда анық байқалады. Мұнда екінші нарықтағы пәтердің шаршы метрі орта есеппен 746 мың теңгеге бағаланса, жаңа тұрғын үйлердің бағасы 733 мың теңге деңгейінде. Сарапшылардың айтуынша, сатып алушылар толық жөндеуді қажет ететін жаңа пәтерлерден гөрі, дайын баспананы көбірек таңдай бастаған.

Баға бойынша Алматы тағы да елдегі ең қымбат қала атанды. Оңтүстік астанада жаңа тұрғын үйдің шаршы метрі 733 375 теңгеге жетсе, Астанада бұл көрсеткіш 731 990 теңгені құрады. Жалға беру нарығында да Алматы алда тұр. Бір шаршы метрді жалдау құны 5 824 теңге болса, елордада 5 529 теңге деңгейінде қалыптасқан.

Сарапшылар мегаполистердегі халық санының өсуі мен ішкі миграция тұрғын үйге сұранысты күшейтіп отырғанын айтады. Соның салдарынан нарықтағы тапшылық бағаның жоғары деңгейде сақталуына әсер етуде.

Сонымен қатар өндірістік аймақтардағы тұрғын үй де қымбаттап келеді. Мәселен, Атырауда жаңа үйлердің шаршы метрі 537 мың теңгеге жетсе, Өскеменде 530 мың теңге болған. Бұған өңірлердегі жоғары жалақы мен өндірістік сектордың белсенділігі ықпал етіп отыр.

Сарапшылардың пікірінше, алдағы айларда ипотекалық нарықтағы өзгерістер мен инфляция деңгейі тұрғын үй бағасына негізгі әсер ететін факторлардың бірі болып қала береді.