Алматы облысында 19 жыл бұрынғы қылмыс әшкереленді: қылмыскер 16 жылға сотталды

Алматы облысының прокурорлары мұрағатта шаң басып жатқан ескі істі қайта жаңғыртып, жиырма жылға жуық уақыт бойы жазадан қашып жүрген қылмыскерді ұстады. Прокуратура қызметкерлерінің кәсібилігі арқасында үшінші сыбайлас анықталып, тиісті жазасын алды, деп хабарлайды Arasha.kz.

Қанды оқиға 2006 жылдың қыркүйек айында болған. Үш ер адам Алматы қаласында Қырғыз Республикасының азаматшасын такси ретінде көлікке мінгізіп, кейін оны буындырып өлтірген. Қылмыскерлер әйелдің бағалы заттарын тонап, мәйітін «Алматы – Қапшағай» тасжолының бойына тастап кеткен.

2007 жылы қылмысқа қатысқан екі адам сотталғанымен, үшінші күдіктіге қатысты іс негізсіз тоқтатылып, архивке жіберілген. Тіпті, бұл іс талапқа сай «өткен жылдардағы ашылмаған қылмыстар» тізіміне де енгізілмей қалған.

Бұл жасырын қалған қылмыстың бетін ашуға Алматы облысы прокуратурасының қызметкерлері Аида Иманалиева мен Алия Сарсекееваның мұқият талдау жұмыстары себеп болды.

Мониторинг  ескі істерді қайта қарау барысында бұл істің заңсыз тоқтатылғанын байқаған.

Деректер базасын жан-жақты салыстырып, қосымша мәліметтерді жинақтау арқылы күдікті «К»-ның Қарасай ауданында жасырынып жүргенін анықтаған.

Прокуратура мамандары тергеу органдарына нақты нұсқаулар беріп, істің аяғына дейін жетуін қадағалаған.

Көп жыл бойы іздеуде болған күдікті 2025 жылдың 9 шілдесінде ұсталды. Тергеу барысында барлық дәлелдемелер жинақталып, іс сотқа жолданды.

2026 жылғы 24 ақпанда сот шешімімен кінәлі азамат 16 жылға бас бостандығынан айырылды. Қазіргі уақытта сот үкімі әлі заңды күшіне енген жоқ.