Алматы облысында Alatau Investment Forum 2025 өтті

Шараға көрші мемлекеттерден 300-ден астам инвестор мен бизнес өкілі келді.

Жиын нәтижесінде жалпы құны 770 млрд теңгеден асатын 16 меморандумға қол қойылды. Форум барысында өңірдің өндірістік аймақтары, индустриялық алаңдары және логистикалық мүмкіндіктері таныстырылды. Бұл нысандар ірі жобаларды қабылдауға толық дайын екені айтылды.

Қазір Алматы облысында жалпы құны 6 трлн теңге болатын 216 инвестициялық жоба іске асуда. Сол арқылы 80 мыңнан астам жаңа жұмыс орны ашылады. Инвестиция көлемін ұлғайту мақсатында ұйымдастырылған Alatau investment форумында инвесторларға ұсынылатын ынталандыру тетіктері де көрсетілді.

Марат Сұлтанғазиев, облыс әкімі:

- Қолдау мақсатында біздің тараптан ұсынылатын басты мүмкіндіктер: ол заманауи индустриялық аймақтар, қайта өңдеу, логистика, денсаулық сақтау және агросектордағы жобалар. Инженерлік инфрақұрылымды мемлекет есебінен дайындау, бірден іске қосуға дайын жер телімдері. Инвесторлардың барлық мәселелері әкімдіктің тікелей назарында болады.

Форум барысында 776 млрд теңгеден асатын 16 меморандумға қол қойылды. Құжаттар өнеркәсіп, ауыл шаруашылығы, логистика, энергетика және туризм салаларын дамытуға бағытталған. Сондай-ақ шекара маңындағы сауда мен туризм инфрақұрылымын арттыру үшін Қырғызстанның Ыстықкөл облысымен жол картасы бекітілді.

Аскат Азарбеков, Ыстықкөл облысы өкілдігі аппаратының жетекшісі:

 - Бұл құжат екі өңірдің ортақ мүддесіне сай келеді. Туризм, өндіріс және инфрақұрылым бағыттарында өзара ынтымақтастықты жаңа деңгейге көтеруге мүмкіндік туады. Келісім толық жүзеге асса, әріптестік аясы кеңейіп, қос тарап та айтарлықтай нәтижеге қол жеткізеді деп сенеміз.

Алматы облысы соңғы жылдары инвестиция тартуда тұрақты өсім көрсетіп отыр. Өткен жылы көлем 1 трлн теңгеден асты. Биылғы 10 айда 834 млрд теңге игерілді. Жыл соңына дейін меже 1,3 трлн теңгеге жетеді деп жоспарланып отыр.

Авторлары: Гүлім Советқан, Аят Дүйсембай, Аманжол Жөнкешов