Алматы облысында халықаралық семинар өтті

Алматы облыстық білім басқармасының ұйымдастыруымен Кеген ауданында «Ұлттық құндылықтың қайнар көзі – ұрпақтар сабақтастығы» атты халықаралық ғылыми-тәжірибелік семинар өтті.  

Білім сапасын артыруға арналған аталған іс-шара барысында Бөлексаз орта мектебінде белгілі тілші, ғалым, «Сатылай кешенді оқыту» технологиясының авторы, педагогика ғылымдарының докторы, профессор Нұрша Алжанбайқызы Оразахынова атындағы кабинет ашылды.

Оразахынова Нұрша Алжанбайқызы өзінің «Сатылай кешенді оқыту» технологиясы арқылы отадық педагогика ғылымын дамытуға өлшеусіз үлес қосқан тұлға. Өйткені осыдан 30 жыл бұрын қолға алынып, еліміздегі жекелеген мектептерде эксперимент ретінде жүзеге аса бастаған бұл технология осы уақытқа дейін өзінің тиімділігін, өміршеңдігін дәлелдей білді.

Нұрша Оразахынова, Педагогика ғылымдарының докторы, профессор:

- Өзімнің туған ауылым. Осы ауылда дүниеге келдім, осы ауылда 8 жылдық мектепті бітірдім. Ол кезде біздің мектеп 8 жылдық мектеп еді. Бұл кішкентай ауыл болғанымен мұнда талантты балалар өте көп. Балалардың әрі қарай білімін, ғылымын ұштау мақсатында жасалып жатқан үлкен шара.

Бөлексаз ауылдық мәдениет үйінде өткен «Ұлттық құндылықтың қайнар көзі – ұрпақтар сабақтастығы» атты халықаралық ғылыми-тәжірибелік семинарға отандық және шетелдік ғалымдар қатысып, «Сатылай кешенді оқыту» технологиясының тиімділігіне айрықша тоқталды. Өйткені тілші ғалым бірнеше жылдан бері көршілес Қырғыз елі мен Моңғолия және Өзбекстан мемлекетінің ғалымдарымен тығыз байланыста жұмыс істеп келеді.

Кыялбек Акматов, Педагогика ғылымдарының докторы, профессор:

 - Нұрша Алжанбайқызымен біздің Қырғызстандағы ғалымдардың, мұғалімдердің байланысына екі жылдың жүзі болып қалды. Бұл сатылай кешенді оқыту технологиясы Қырғызстанда да біздің қырғыз тілін жаңағы оқытуға кіргізу бойынша, осы технологияны пайдалану бойынша бір топ жұмыстарды жасап жатырмыз. Бұл технологияның актуалдылығы күшті.

Қырғызстандық ғалымдар алдағы жылы мамыр айында Бішкекте «Сатылай кешенді оқыту» технологиясы бойынша халықаралық олимпиада өтетінін айтып, сүйіншіледі. Ғылыми-тәжірибелік семинар қорытындысы бойынша Бөлексаз орта мектебінен өзінің жарты ғасырға жуық уақытын ұстаздық етуге арнаған Нұрша Алжанбайқызының кабинеті ашылды.

Авторлары: Ардақ Айбарұлы, Аманжол Жөңкешов