Алматы облысында түрмедегілер қылмыстық топ құрып, өзге сотталушылардан ақша бопсалаған

АСТАНА, 17 маусым – Sputnik. Алматы облысында ұйымдасқан қылмыстық топтың қатысушылары ұзақ мерзімге бас бостандығынан айырылды, деп хабарлады бас прокуратура.

Алматы облысының қылмыстық істер жөніндегі мамандандырылған ауданаралық соты Заречный кентінде орналасқан №14 түзеу мекемесінде қылмыстық әрекет ұйымдастырған қылмыстық топтың 10 мүшесіне қатысты үкім шығарды.

Анықталғандай, 2022-2024 жылдар аралығында аталған мекемеде жазасын өтеп жүрген жекелеген сотталғандар тұрақты ұйымдасқан қылмыстық топ құрып, психологиялық қысым көрсету және күш қолдану арқылы басқа сотталғандарға қатысты заңсыз әрекеттер жасаған.

"Ұйымдасқан қылмыстық топтың мүшелері басқа сотталғандардан жүйелі түрде ақша бопсалап отырған. Алынған қаражат банк карталарына және Kaspi мен басқа да мобильді қосымшалардағы өздерінің бақылауындағы шоттарға аударылған. Талаптарын орындаудан бас тартқан жәбірленушілер ұрып-соғуға, қорлауға және өзге де дене күшін қолдану түрлеріне ұшыраған", - деп жазылған хабарламада.

Сот ұйымдасқан қылмыстық топтың мүшелерін тағылған айыптардың барлық тармағы бойынша кінәлі деп танып, оларға 10 жылдан 15 жылға дейінгі мерзімге бас бостандығынан айыру жазасын тағайындады.

Үкім заңды күшіне енген жоқ.