Алматы облысында үш ауысымды мектептер саны 52 ден 28 ге дейін азайды AMANAT

Алматы облыстық мәслихатындағы «AMANAT» партиясы депутаттық фракциясының отырысы өтті. Жиын барысында облыс әкімі Марат Сұлтанғазиев өңірде партияның сайлауалды бағдарламасы аясында атқарылып жатқан жұмыс туралы баяндады, – деп хабарлайды Aikyn.kz сайты.

Оның айтуынша, биыл облыс экономикасында өсім бар. Қаңтар-қараша айларында облыстың қысқа мерзімді экономикалық индикаторы 109,8 пайызды құрады. Өндіріс, сауда, құрылыс және тұрғын үй салалары алға жылжыды. Ал инвестиция көлемі бір жылда 26%-ға артты.

«Биыл «AMANAT» партиясының Жол картасында жоспарланған 95 іс-шараның 65%-ы орындалды. Жалпы, Жол картасында көзделген 106 іс-шара кезең-кезеңімен жүзеге асырылып жатыр. Оның ішінде, ауыл тұрғындарының табысын арттыруға бағытталған «Ауыл аманаты» партиялық жобасы аясында жалпы сомасы 10,8 млрд теңгені құрайтын 1 231 несие беріліп, 1 471 жұмыс орны ашылды. Ал «Жер аманаты» партиялық жобасы аясында пайдаланылмай жатқан 91,1 мың гектар жер мемлекет меншігіне қайтарылды», – деді Марат Сұлтанғазиев.

Сонымен қатар биыл облыста жалпы құны 180 млрд теңгені құрайтын 12 ірі инвестициялық жоба іске қосылды. Соның нәтижесінде 6 мыңнан астам адам тұрақты жұмыспен қамтылды. Балмұздақ өндіретін «Шин Лайн» зауыты, «КегенМясПром» ет комбинаты, «Hong Shun» сұйық әйнек зауыты және ірі логистикалық «Focus Logistics» компаниясы жұмысын бастады. Сондай-ақ «LC Waikiki» компаниясының көтерме-тарату орталығы пайдалануға берілді. Аталған жобалар өңір экономикасына нақты серпін беріп отыр.

«Партияның сайлауалды бағдарламасы аясында білім беру саласында 2022 жылдан бері 69 жаңа мектеп салынды, 55 мектеп күрделі жөндеуден өтті. Соның нәтижесінде үш ауысымда білім беретін мектептер саны 52-ден 28-ге дейін азайды. Биыл денсаулық сақтау саласында 19 медициналық нысан пайдалануға беріліп, медициналық ұйымдардың жабдықталу деңгейі 92%-ға жетті. Сонымен қатар өңірде 1 млн шаршы метрден астам тұрғын үй пайдалануға берілді. Облыстық маңызы бар 254 шақырым жол жөнделіп, елді мекендердегі 702 шақырым ішкі жол жаңартылуда. Таза ауыз сумен қамту деңгейі 99,6%-ға жетсе, жыл соңына дейін облыс тұрғындарының 80%-дан астамы газға қол жеткізеді. Жол картасына енгізілген жобалардың барлығы тұрақты бақылауда және кезең-кезеңімен жүзеге асырылады», – деді облыс әкімі.

Отырыс барысында «AMANAT» партиясы жанындағы облыстық Әйелдер қанатының атқарған жұмысы да назарға алынды. Бүгінде Алматы облысында партия мүшелерінің басым бөлігі – әйелдер. Атап айтқанда, өңірдегі 57,6 мың партия мүшесінің 43,2 мыңы – қыз-келіншектер. Сонымен қатар облыс аумағындағы әр төртінші депутат – әйел, ал бір аудан мен жеті елді мекенді тікелей сайланған әйел әкімдер басқарып отыр.

«Жыл басынан бері 200-ден астам іс-шара өткіздік. Тұрмыстық зорлық-зомбылыққа тап болған 78 әйелге құқықтық және психологиялық көмек көрсеттік. Кәсіп ашуға ниетті 250-ден астам әйелді оқытып, бүгінде олардың бір бөлігі өз ісін бастады. Ерекше баласы бар отбасылармен тұрақты жұмыс жүргізіп, балалар мен аналарға нақты қолдау көрсеттік», – деді облыстық Әйелдер қанатының төрағасы, мәслихат депутаты Меруерт Молдашева.

Жиын соңында облыс әкімі Марат Сұлтанғазиев партияның сайлауалды бағдарламасының орындалу барысын жеке бақылауға алғанын мәлімдеді. Оның айтуынша, Жол картасына енген жобаларды өзі, орынбасарлары және жауапты басқарма басшылары тікелей қадағалап отыр. Атқарылып жатқан жұмыстар өңір дамуына және халықтың тұрмысын жақсартуға бағытталған.