Түркістан облысында Келешек мектептері үш ауысымды оқу орындарының мәселесін шешті

Түркістан облысында «Келешек мектептері» үш ауысымға өту қаупі бар мектептердің мәселесін шешуге ықпал етіп келеді.

Демографиялық өсімі жоғары Сарыағаш ауданында ұлттық жоба аясында төрт білім ошағын салу көзделіп отыр. Биыл соның үшеуі пайдалануға берілді.

Сарыағаш ауданындағы алғашқы «Келешек мектебі» былтыр желтоқсан айында тапсырылды. 900 орынға арналған білім ордасы Дербісек ауылында бой көтерді. Бұрын көрші елдімекендегі мектепке қатынап оқыған  балалар үшін бұл үлкен қуаныш болды. Заманауи кабинеттер мен зерханалар ауыл балаларының сапалы білім алуына жол ашты.

Шұғыла Адырбай, оқушы:

- Бұл мектеп өте жайлы. Мен алдыңғы мектепте осыншалықты көп мүмкіншіктер ала алмадым. Басқа қосымшаға қатысатын едім. Осы мектепте өз-өзімді жан-жақты дамытып, шыңдаймын. Өзіміздің керек деген таңдау пәндерімізге және қалаған үйірмелерімізге қатыса аламыз.

Сарыағаштағы №80 жалпы білім беретін мектеп пен Жаскешудегі Бейімбет Майлин атындағы білім ордасы жаңа оқу жылында ашылды. Екі қабатты ғимараттар заманауи стандарттарға сай салынған. Ең бастысы соңғы үлгідегі оқу құралдармен жабдықталған.

Аяулым Жорабекова, қосымша білім беру мұғалім:

- Сабақты жасанды интелект пен денацификацияланған бағдарламалық құралдарды қолдану арқылы ұйымдастырамыз. Әр оқушының алғашқы қадамын қалыптастыру және оны тұлға ретінде дамыту біздің міндетіміз. Сондықтан мен «Келешек мектебінде» жас маман ретінде өзімнің еңбек жолымды бастағаныма өте қуанамын. Осы білім ордасында жұмыс істеу мен үшін үлкен мәртебе.

Әшірбек Әдиев, Сарыағаш аудандық Білім бөлімінің бас маманы:

- Конкурс арқылы білікті, білімді, санаты бар мұғалімдерді қабыладық. Бір ауысымды болғандықтан оқушыларға түстен кейінгі қосымша біліммен қамту жұмыстары жүріп жатыр. Сол үшінде оқушыларға бұл өте тиімді. Қала менен ауылдың деңгейін бірдей ұстау мақсатында соғылған мектептер. Қазіргі таңда үшаусымға өту қауіпі бар деген 5 мектептің проблемасын шешіп отыр.

Сарыағаштың Мұнара шағын ауданындағы төртінші «Келешек мектебі» алдағы қараша айында пайдалануға берілмек. Осылайша, қатынап оқып келген 640 оқушы жергілікті жерде білім алады.

Авторлары: Жандос Жұмабек, Қуаныш Әбуов