Алматы облысында жасөспірім боксшылардың турнирі өтіп жатыр

Алматы облысы Қарасай ауданында бокстан еңбек ардагері Амангелді Бектасовты еске алуға арналған бірінші республикалық ашық турнир өтті.  Додаға Қазақстанның барлық өңірлері мен Қырғызстан, Өзбекстан және Тәжікстан боксшылары қатысты, - хабарлайды Aikyn.kz

Турнир 2010-2011 жылы туған жасөспірім боксшылардың басын қосты. Оған барлығы 300-ге жуық спортшы қатысты. Жарыс ұйымдастырушысы Жеңіс Бектасовтың айтуынша, бұл доданы өткізудегі басты мақсат – жас боксшыларға жігер беріп, болашақ әлем және Олимпиада чемпиондарына жол ашу.

«Әкеміз Амангелді Бектасов жастайынан бокспен шұғылданып, Қарасай ауданында спорт шеберлігіне үміткер – тұңғыш адам. Өмірін еңбекке, бала тәрбиесіне арнаған әкеміз қазақ боксының қара нарларымен бірге жүрді. Серік Әбденәлиев, Валерий Рачков сынды әйгілі спортшылар біздің үйімізде жиі қонақ болатын. Әкеміз алты баласын да спортқа баулып өсірді. Әлі күнге дейін дене жаттығуын қалдырмаймыз. Өмірінің соңында бізге қазақ боксының дамуына үлес қосуды аманатап кетті. Бүін соның сәті түсті. Жас боксшыларға қолдау көрсетіп, үлкен жарыстарға жол ашу мақсатында осы турнирді ұйымдастырдық. Кім біледі, болашақ Олимпиада чемпиондары осылардың арасында жүрген шығар?!», — дейді Жеңіс Амангелдіұлы.

Жарыстың құрметті қонақтары қатарында Сидней Олимпиадасының чемпионы Ермахан Ыбырайымов, Бейжің Олимпиадасының күміс жүлдегері Нұрбақыт Теңізбаев, ММА шебері Арман Оспанов, кәсіби боксшы Садриддин Ахметовтер бар.

«Бокс қазақ халқы үшін әрдайым нөмірі бірінші спорт түрі болып қала бермек. Осы орайда, жас боксшыларды ынталандыратын кереметтей турнирдің куәсі болып отырғанымызға қуаныштымын. Мұндай бәсекелер жастарға жол ашып қана қоймай, шеберлігін шыңдап, техникасын жетілдіруге көмектеседі. Біз әлемдегі мықты бокс державаларының біріміз. Сондықтан, біздегі резерв азаймау керек, қазақ жұдырығының құдыреті асқақтай беруі тиіс», — дейді Олимпиада чемпионы Ермахан Ыбырайымов.

Турнирді ұйымдастырушылар жарыс жеңімпаздары мен жүлдегерлеріне естелік мүсіншелер, чемпиондық белбеулер мен ақшалай жүлделер тағайындаған.