Алматы тұрғындары отшашуды көптеп сатып алуда

Алматыда пиротехникаға сұраныс күрт артты. Лицензияланған ресми дүкендер мен базарларда ұзын-сонар кезек.

Сатушылардың айтуынша, биылғы сұраныс әдеттегідей желтоқсанда басталған, ал тауарлар санаулы күннің ішінде өтіп кетіп жатыр. 

Жаңа жылдың жақындағанын сауда орындарындағы адамның көптігінен-ақ байқауға болады. Бұл лицензияланған дүкенде пиротехника түрлері кез келген талғамға сай. Қарапайым бенгаль оттарынан бастап, неше дүркін жарқылдайтын үлкен отшашуларға дейін бар. Сатушылардың сөзінше, мереке қарсаңында бір жұмыс күнінің өзінде дүкенге 500-ге дейін сатып алушы келеді. Қала тұрғындары ақшаны аямайды. Қазақстандықтардың жаңажылдық дастарқанға арналған азық-түлікті қымбатсынуына қарамастан отшашуға сұраныс көп. Фейерверктердің бағасы бірнеше жүз мың теңгеге жетеді.

Төлеген Кіржібаев, Фейерверк дүкенінің инженер-пиротехнигі:

- Жаңа жыл қарсаңындағы қызу сұраныс негізінен соңғы екі-үш күнде байқалады. Өйткені адамдар әдеттегідей бәрін соңғы күнге қалдырады. Сол себепті бүгін-ертең бізде пиротехника сатып алушылар көп болады.

Жаңа жылдық мереке қарсаңында Алматы қаласының Төтенше жағдайлар департаменті пиротехникалық бұйымдарды қолдану кезіндегі қауіпсіздік шараларын күшейтті. Төтеншеліктер полиция қызметкерлерімен бірлесіп, заңсыз сауданы анықтау мақсатында күн сайын рейдтер өткізуде. Бүгінгі күнге дейін 78 тексеру жүргізіліп, нәтижесінде 28 әкімшілік хаттама толтырылған. Департамент өкілдері пиротехниканың қауіпті екенін және тиісті ережелерді қатаң сақтау қажеттігін еске салады.

Жандар Дулат, Алматы қаласы ТЖД Мемлекеттік өрт бақылау басқармасының аға инженері:

- Рейд барысында заңсыз сатуға қатысты профилактикалық шаралар жүргізілді. 16 жасқа толмаған жастар ересектердің рұқсатынсыз, яғни қасында болмауынсыз атуға тыйым салынады. Онымен қоса ғимараттар мен тұрғын үйлердің қасында 50 метр ара қашықтықта болу керек. Желді ауа райында және де электр сымдар бар жерде, ағаштар бар жерде және басқа да кедергі заттар бар жерлерде атуға тыйым салынады.

Биыл Алматыда фейерверктердің бағасы 3,5 мың теңгеден басталып, жарты миллион теңгеге дейін барады. Бағасының қымбат болуына қарамастан, алматылықтар Жылқы жылын жарқын әрі әсерлі қарсы алу үшін пиротехниканы белсенді түрде сатып алуда.

Авторлары: Нұрқанат Атажан, Айдос Қалиев, Кенже Амраев