Алматы облысында өндіріске жастар көптеп келе бастады

Алматы облысындағы «Фирма «БЕНТ» жауапкершілігі шектеулі серіктестігі темір-бетон шпалдары мен рельс бекіткіштерін өндірумен айналысатын еліміздегі жетекші кәсіпорын. 40 жылдық тарихы бар зауытта мыңнан астам адам еңбек етеді. «БЕНТ» компаниялар тобының мақсаты – нарықта сұранысқа ие, жоғары сапалы және сенімді өнімді ұсына отырып, көлік инфрақұрылымын дамытуға елеулі үлес қосу. 

Әділхан Садықаев «Фирма «БЕНТ» жауапкершілігі шектеулі серіктестігінде 15 жылдан бері еңбек етіп келеді. Ол осы уақыт ішінде зауыттағы тәжірибелі операторлардың біріне айналды. Кәсіпорын бүгінде еліміздегі жүзден астам компанияны темір-бетон шпалдарымен және рельс бекіткіштерімен қамтамасыз етеді. 

Әділхан Садықаев, «Фирма «БЕНТ» ЖШС операторы:

- Екі ауысыммен жұмыс жасаймыз. Біз күніне 10 мың комплект пружина, 10 мың комплект болт шығарамыз. Оператормын, мына роботтарға қарап отырамын. Жұмысым қиын емес, жеңіл, бірақ жауапкершілігі көп жұмыс.

Кәсіпорын рельс бекіткіштерінің барлық түрін өндіреді. Өнім дайын болысымен сынақ зертханасына жіберіледі. Әлібек Иса алдына келген әр бөлшекті физикалық және химиялық талдаудан өткізіп, құрамының дұрыстығы мен дәлдігін тексереді. 

Әліби Иса, «Фирма «БЕНТ» ЖШС жетекші маманы:

- Бұл жерде дайын өнімді тексеретін 3-4 аппаратымыз бар. Сол арқылы біз тексерістен өткен сапалы өнімді лабораториямыздан өткеннен кейін ғана темірбетон  шпал шығаратын зауытқа рұқсатымызды береміз.

Дінмұхамед Кузиев, «БЕНТ» компаниялар тобының президенті:

- Мемлекет басшысының бұл жылды жұмысшы мамандықтар жылы деп жариялауы тегін емес. Біз мемлекеттік органдармен бірлесе отырып жастар арасында техникалық мамандықтарды насихаттап, оларды оқытып, өндіріске көптеп тартып жатырмыз.

«Өндірісте жұмыс істегісі келетін жастардың қатары артып келеді. Біздің оқу орталығымызда жылына 12 техникалық мамандық бойынша 250 маман даярланады», - дейді компания басшылығы. 

Авторлары: Ардақ Айбарұлы, Аят Дүйсенбаев, Аманжол Жөңкешов