Алматы жолдарында жасырын патрульдер пайда болды

Алматыда тексеріс күшейтілді: ережебұзушыларды енді "жасырын" патрульдер тіркейді, - деп хабарлайды Tengri Auto тілшісі Polisia.kz-ке сілтеме жасап.

Алматыда тексеріс күшейтілді: ережебұзушыларды енді "жасырын" патрульдер тіркейді, - деп хабарлайды Tengri Auto тілшісі Polisia.kz-ке сілтеме жасап.

Бұл жерде азаматтық киімде, арнайы белгілері жоқ автокөліктермен жалпы көлік ағынында жүріп, қызмет атқаратын патрульдік полиция қызметкерлері туралы сөз болып отыр. Негізгі мақсат – жол қозғалысы ережелерін өрескел бұзу деректерін анықтау, әсіресе агрессивті жүргізу фактілерін әшкерелеу. Олардың қатарында күрт жолақ ауыстыру, "шахмат" тәсілімен жүру, басқа көліктерді қысып өту және апаттық жағдайлар туындату сияқты қауіпті әрекеттер бар.

Мұндай жүргізушілер туралы ақпарат нақты уақыт режимінде жақын маңдағы экипаждарға жолданады, олар көлікті тоқтатып, құқық бұзушылықты рәсімдейді.

Полиция мәліметінше, тек өткен демалыс күндері Алматыда агрессивті жүргізудің 28 жағдайы анықталған. Барлық жүргізуші жауапкершілікке тартылды.

"Мұндай деректер жедел түрде жақын маңдағы экипаждарға жеткізіліп, тиісті шаралар қабылданады. Біздің міндет – жауапкершілікке тарту ғана емес, қауіпсіз жүргізу мәдениетін қалыптастыру", – деді ПД әкімшілік полиция басқармасының бастығы Әбдінұр Тасыбаев.

Ведомство мәліметінше, жасырын патруль форматы жүргізушілердің мінез-құлқын барынша табиғи жағдайда тіркеуге мүмкіндік береді — яғни "көрінетін полиция" әсері жоқ, жол қозғалысына қатысушылар қызметтік көлікті көргенде жүргізу стилін кенет өзгертпейді.

Мұндай тәсіл жолдағы жағдайды объективті бағалап, кездейсоқ қателік емес, жүйелі ереже бұзу жағдайларын анықтауға көмектеседі.

Мұндай тәжірибе басқа елдерде, соның ішінде Еуропада бұрыннан қолданылады. Мысалы, Германия, Нидерланд және Ұлыбританияда "белгісіз полиция көліктері" (unmarked cars) пайдаланылады, олар жалпы ағында жүріп, агрессивті жүргізуді, жылдамдықты асыруды және қауіпті маневрлерді тіркейді. Бірқатар жағдайда мұндай экипаждар бейнетіркегіштер және арнайы бақылау жүйелерімен жабдықталады, бұл стационарлық бекеттердің қатысуынсыз-ақ заңбұзушылықтарды құжаттандыруға мүмкіндік береді.

Айта кетейік, Алматы жолдарындағы бақылаудың күшеюіне қоғамдық резонанс тудырған жол-көлік оқиғасы себеп болды: 21 наурызда әл-Фараби мен Меңдіқұлов көшелерінің қиылысында Mercedes пен Zeekr көліктері соқтығысты. Жол-көлік оқиғасы салдарынан үш адам қаза тапты. Mercedes-тің 29 жастағы жүргізушісі және екі жолаушысы – 20 және 22 жастағы қыздар оқиға орнында тіл тартпай кетті. Zeekr жүргізушісі аман қалып, түрлі жарақатпен ауруханаға жатқызылды. Апат кезінде ол мас болған.

Бұдан бөлек, мемлекеттік нөмірлерді заңсыз беру мүмкіндігі туралы уәждер бойынша өзіндік қауіпсіздік департаменті қылмыстық іс қозғады, бірқатар лауазымды адам қызметінен айырылды.

Бұған дейін, Алматыға басқа өңірлерден патрульдер келгені туралы хабарланған болатын.

Следите за нашими новостями в Google News