Алматыда ауаны тазартуға қандай шаралар қолданылады

Қала әкімдігінің мәліметінше, ауа ластануын азайтуға бағытталған игі бастамалардың бірі – атмосфералық ауаны қорғауға арналған жаңа ережелер жобасын әзірлеу, яғни «Атмосфералық ауаны қорғау саласындағы арнайы экологиялық талаптарды енгізу туралы» құжат.

– Құжат биыл тамыз айында қоғамдық талқылаудан өтті. Жобаның басты мақсаты – мегаполистегі ауаның ластану деңгейін жүйелі түрде төмендету. «Ренессанс плюс» компаниясының мәліметінше, зиянды шығарындылардың шамамен 60 пайызы автокөліктен шығады. Қалған бөлігі жеке тұрғын үйлер өнеркәсіп орындары, монша мен кәуапхана, қоғамдық тамақтану нысаны мен құрылыс алаңдары сынды стационарлық ластану көздерінің қызметімен байланысты, - деп хабарлады әкімдіктен.

Қала басшылығы бұл құжаттағы ережелер қаланың болашақ экологиялық саясатының берік іргетасы болатынын атап өтті.

– Оның негізінде зиянды шығарындыны азайтуға, ауа сапасын жақсартуға бағытталған нақты қадамдар мен тетіктер кезең-кезеңімен жүзеге аспақ. Ұсынылған шаралардың арасында өндіріс ошақтарын жаңғырту, экологиялық таза отын түрлеріне көшу секілді маңызды бағыттар бар, - делінген мәлімдеме.

Сонымен қатар «Таза ауа аймағы» жобасы аясында жүргізілген сауалнама барысында кейбір тұрғындар таза ауамен тыныстау үшін тауға шығуға мәжбүр екенін жеткізген. Олардың пікірінше, экологиялық ахуалды жақсарту бірлескен күш-жігердің нәтижесінде ғана жүзеге асатын ортақ іс.

Еске салайық, бұған дейін «Ашық НҚА» сайтында Алматы ауасын тазартудың жаңа ережелері талқылауға шығарылғанын жазған едік.