Алматыда автобус жолақтары қай жерде алынып тасталды: не өзгерді

Алматыда автобус жолақтарының сызбасы қайта қаралып жатыр. Tengri Auto бұл өзгерістердің себебін тиісті басқармадан біліп көрді.

Сәтбаев көшесіндегі автобус жолағы алынып тасталды ма?

Алматы тұрғындары Сәтбаев көшесіндегі ADK СОО маңында қоғамдық көлікке арналған арнайы жолақтың жоғалып кеткенін байқаған.

Жол қозғалысын ұйымдастыру және жолаушылар көлігі басқармасы бұл ақпаратты растады: Сәтбаев пен Щепетков көшелерінің Тілендиевтен Өтеген батырға дейінгі учаскесінде автобус жолағының белгілері мен таңбалары уақытша алынып тасталды.

"Жол-көлік жағдайына (автобус маршруттарының көлік ағынының қозғалысына) талдау жүргізіліп жатыр, оның нәтижелері бойынша арнайы жолақтарды енгізу мәселесі қарастырылады", – деп хабарлады басқарма.

Фото Tengrinews.kz

Фото Tengrinews.kz

Алайда түпкілікті шешімнің қашан қабылданатыны әзірге нақтыланбады.

Өзгерістер Наурызбай батыр көшесіне де әсер етті. Желтоқсан көшесінде BRT-ның екінші кезеңі аяқталғаннан кейін, автобустар ол жерде екі бағытта да қатынай бастады.

Енді басқарма автобус бағыттарын Наурызбай батыр көшесінен Желтоқсан бойындағы BRT дәлізіне ауыстырып, босаған жолақты велосипедшілерге беруді ұйғарды.

"Наурызбай батыр мен Желтоқсан көшелерінің арақашықтығы жақын болғандықтан, бұл шешімді жолаушылар үшін көлік қолжетімділігін айтарлықтай төмендетпей жүзеге асыруға мүмкіндік туды", – деп түсіндірді ведомство өкілдері.

Ведомствоның мәлімдеуінше, бұл қадамға дейін мамандар көлік жүктемесін, жолаушылар ағынын, автобус бағыттарының санын, жолаушылар жолының ықтимал ұзаруын, сондай-ақ аялдамалар мен ауысып міну орындарының қолжетімділігін зерттеген.

Сондай-ақ басқарма жаңа сызба жеке көлік қозғалысына әсер етпеуі тиіс деп санайды.

"Ал Наурызбай батыр көшесінің бойында орналасқан бизнес нысандары үшін көлік және жаяу жүргіншілер қолжетімділігі қазіргі деңгейде сақталады, себебі жобалық шешімнің іске асырылуы нысандарға келушілердің кіруіне, қызмет көрсетуіне және қолжетімділігіне теріс әсер етпейді", – деп хабарлады баспасөз қызметі.

Фото Tengrinews.kz / Ақбота Сіләм

Сонымен қатар ведомство автобустарды Желтоқсан көшесіндегі екі жақты BRT желісіне ауыстыру қоғамдық көліктің қозғалыс жылдамдығын арттырады деп күтеді.

2026 жылдың соңына дейін Алматының қай көшелерінде жаңа автобус жолақтары пайда болуы мүмкін екенін нақтыладық.

Басқарма әзірге нақты көшелер мен мерзімдерді атаған жоқ. Қазіргі уақытта мамандар қаланың негізгі магистральдарындағы жағдайды талдап жатыр.

"Жол қозғалысын ұйымдастырудағы кез келген өзгерістер қазіргі уақытта тек қарастыру, зерделеу және талдау сатысында", – деп хабарлады ведомство.

Бұған дейін 20 маусымнан бастап Алматыдағы Саин көшесінде пилоттық режимде автобустарға арналған арнайы жолақ іске қосылды.

Алғашқы аптаның өзінде-ақ жоба әлеуметтік желілерде қызу талқыланды. 24 маусымда қарбалас уақытта куәгерлер бұл учаскедегі көлік кептелісін, жол ережесінің бұзылуын және бірнеше жүргізуші арасындағы жанжалды таспаға түсіріп алған.

Алматы әкімдігі пилоттық жоба 20 тамызға дейін жалғасатынын хабарлады. Ол аяқталғаннан кейін қала әкімшілігі қорытынды жасап, арнайы жолақтың алдағы уақытта жұмыс істеуі туралы шешім қабылдайды.

Google News арқылы жаңалықтарымызды қадағалаңыз