Алматыда мәйітті іліп қойған адам полициямен әңгімелесумен құтылды

Әлеуметтік желілерде алматылықтар Абай даңғылындағы ғимараттардың бірінің қасбетінде пайда болған ерекше нысанды талқылап жатыр. Сыртынан оралған адам денесіне ұқсайтын бұл конструкция қала тұрғындарының арасында түрлі пікір тудырып, құқық қорғау органдарының назарын аударды, деп хабарлайды Tengri Life.

Бәрі қалай басталды?

Бұған әлеуметтік желіде жарияланған жазбадағы фото мен видео себеп болды. Автор ғимарат қасбетінен салбырап тұрған оғаш нысанға назар аударып, оның жарнамалық безендірудің бір бөлігі екенін немесе басқа нәрсе екенін білгісі келген.

Скриншот: Threads

Пікір қалдырушылар мұндай декорацияның қаншалықты орынды екенін талқылады. Көпшілік бұл безендірудің тым шынайы әрі қорқынышты көрінетінін атап өткен.

"Сұмдық, бұл не деген ақымақтық. Қараудың өзі жағымсыз", "Жақында Хэллоуин болады, соған орай безендірген шығар. Бірақ бұл өте қорқынышты, әсіресе түнде көрсең", "Зәрем ұшты, тіпті тереземнің алдында тұр", "Бұл күлетін нәрсе емес, кезінде бір каскадер осылай қайтыс болған", - деп жазды желі қолданушылары.

Алматы Полиция департаменті бұл оқиғаның 22 қазанда болғанын хабарлады. Патрульдеу кезінде учаскелік инспектор сырттай адам бейнесіне ұқсайтын күмәнді затқа назар аударған.

"Полицейлер ақпаратты бірден тексерді. Тексеру барысында пакеттің ішінен пластикалық материалдар табылды. Адам денесі туралы ақпарат расталмады. Бұл нысанды мекеме иесі Хэллоуин мерекесіне орай декоративті элемент ретінде дайындағаны анықталды", - деп мәлімдеді ведомство өкілдері.

Нысан иесімен түсіндіру жұмыстары жүргізілді.

"Қоғамдық орындарды безендіру кезінде келушілер мен айналадағы адамдардың реакциясын ескеру маңызды. Төтенше жағдай немесе адамдардың өмірі мен денсаулығына қауіп төндіретін белгі ретінде қабылдануы мүмкін декоративті элементтер негізсіз үрей туғызып, жалған ақпараттың таралуына себеп болуы мүмкін", - деп толықтырды полиция.

Қазақстандықтарды халық арасында дүрбелең немесе алаңдаушылық тудыруы мүмкін жағдайларға жол бермей, мұндай шешімдерге жауапкершілікпен қарауға шақырды.

Тағы оқыңыз: “Балық бар деп ойламаппын“: Есентайдан ауланған балық алматылықтарды таңғалдырды

Бізді Google-дың негізгі дереккөздер тізіміне қосыңыз