Алматы әуежайында жолаушыларға лас душ қабылдауға тура келді

Алматы әуежайының жаңа терминалында жолаушылар "құрылыс жаңбырының" астында қалды. 1B ұшу аймағында төбеден кенеттен цемент ерітіндісіне ұқсас сұйықтық тамған. Tengri Travel оқиғаның мән-жайын білді.

"Цементке ұқсайтын бірдеңе"

Біздің WhatsApp нөмірімізге жолаушылардың бірі хабарласты. Оның айтуынша, 1B аймағында рейсті күтіп отырғанда, төбеден белгісіз қоспа тама бастаған. Жолаушы бұл сұйықтықтың цементке ұқсайтынын атап өтті.

Алматы әуежайының баспасөз қызметі Т1 терминалында инфрақұрылымды жаңғырту және пайдалану кезінде анықталған кемшіліктерді жою жұмыстары жалғасып жатқанын хабарлады.

Әуежайдың баспасөз қызметінің мәліметінше, оқиға терминалдың екінші қабатындағы әрлеу жұмыстары кезінде болған. Сұйықтықтың аз мөлшері қабатаралық жабын арқылы жолаушылар күту аймағына өткен.

Әуежай өкілдері ақпаның салдары толық жойылғанын қосты. Терминал штаттық режимде жұмыс істеп тұр.

Еске сала кетейік, Алматы әуежайында мұндай оқиғалар бұған дейін де болған. 2024 жылдың мамыр айында нөсер жаңбырдан кейін терминал ғимаратын су басты: су шатырдан тікелей тексеру және паспорттық бақылау аймақтарына аққан. Ол кезде әлеуметтік желілерде әуежай қызметкерлерінің су басу салдарын жаппай жойып жатқан сәттері жарияланған болатын.

Кейінірек Алматы әуежайы шатырдан су өткені үшін кешірім сұрап, техникалық мәселелер жөніндегі аға вице-президент Мехмет Гюзель тәртіптік жауапкершілікке тартылды.

Тағы оқыңыз: “Айтарға сөз жоқ“. Алматы әуежайы маңындағы келеңсіз жағдай видеоға түсіп қалды

Бізді Google-дың негізгі дереккөздер тізіміне қосыңыз