Алматыда поляк фильмдерінің VIII фестивалі ашылды

Алматыда «Висла» поляк фильмдерінің VIII фестивалі ашылды. Дәстүрлі кинокөрсетілім жыл сайын Астана мен Қарағанды қалаларында өтетін. Биыл Польша кинематографиясының үздік туындыларын алматылық көрермен де тамашалай алады. 

Польшаның ең ұзын өзенінің атауымен аталған «Висла» кинофестивалі 2008 жылдан бастау алады. Осы жылдар ішінде ол Еуропа мен Азияның жиырмадан астам елін қамтыды. Қазақстандық көрерменнің қызығушылығына орай, биылғы фестиваль бағдарламасы да әралуан. Киносүйер қауым назарына халықаралық байқауларда топ жарған үздік заманауи фильмдер ұсынылмақ. 

Дариуш Шевчик, Польша республикасының Алматыдағы бас консулы:

- Дәстүрлі түрде өтетін «Висла» поляк фильмдері фестивалінің тұрақты көрермендері бар. Бұл тек жергілікті поляк ұлтының өкілдері ғана емес, қазақстандық киносүйер қауым да поляк кинематографиясы туындыларын жылы қабылдайды. Бұл бізді өте қуантады. Әрі бұл Қазақстан мен Польшаның мәдени байланысының мығым екенін көрсетеді. 

Поляк кинолары фестивалінің шымылдығы Дорота Кобела мен Хью Уэлчманның «Крестьяне» фильмімен ашылды. Нобель сыйлығының лауреаты жазушы Владислав Реймонттың романы бойынша сызба анимация техникасымен түсірілген драмалық фильм ауыл өмірін, дәстүр мен әлеуметтік қайшылықтарды, әйел тағдырын бейнелейді. 

Сергей Яценко, көрермен:

- Поляк тіліне, мәдениетіне көптен бері қызығамын,түпкі ата-бабаларымда поляк ұлты бар. Польшада да бірнеше рет болдым. Жалпы поляк кинематографиясы әлемдегі ең үздіктердің қатарында. Өте жақсы киномектеп қалыптасқан. Сондықтан фестиваль киноларын көруге кеңес беремін.  

Поляк фильмдерін Atakent Mall сауда үйіндегі Kinopark кинотеатрынан 2 желтоқсанға дейін тегін көруге болады. Барлық фильмдер поляк тілінде, орысша субтитрмен беріледі. 

Авторлары: Гүлжан Көленқызы, Радик Жакупов