Алматыда қалдықтарды басқарудың бірыңғай мониторинг жүйесі енгізіледі

Жиынға қоқыс шығаратын ұйымдардың өкілдері мен аудан әкімдерінің көріктендіру жөніндегі орынбасарлары қатысты.

Қазір қалада 20 қоқыс шығаратын ұйым жұмыс істейді, 258 бірлік арнайы техника тартылған. Оларға бес жыл мерзімге жасалған келісімшарттар негізінде жауапкершілік аймақтары бөлініп, қызмет көрсету учаскелері бекітілген.

2025 жылдың қорытындысы бойынша Алматыда 595 мың тоннадан астам қатты тұрмыстық қалдық жиналып, шығарылды. Ал 2026 жылдың қаңтар-ақпан айларында бұл көрсеткіш 77 мың тоннадан асты.

Талқылау барысында саланы цифрландыру мәселелері басты назарға алынды. Алматы әкімінің орынбасары Нұрлан Әбдірахым GPS жүйесі орнатылмаған әрі «АҚ Тәртіп» ЖШС әзірлеген автоматтандырылған ақпараттық жүйеге қосылмаған техникаларды толықтай жабдықтауды тапсырды.

– Бұл жүйе арқылы техниканың нақты уақыттағы орналасуын және қозғалыс бағытын бақылауға болады. Соның нәтижесінде белгіленген кестеден ауытқулардың алдын алып, заңсыз қоқыс орындарының пайда болуының алдын алады, - делінген хабарламада.

«Eco Almaty» ЖШС қалдықтардың тасымалы мен қоқыс шығаратын ұйымдардың жұмысын қадағалайды.

Еске салайық, бұған дейін Абай облысында қалдықтарды бақылаудың цифрлық жүйесі іске қосылғанын хабарлаған едік.