Алматыда Қазақы тазы көрмесі өтіп жатыр

Алматыда екі бірдей кинологиялық шара өтіп жатыр. Бірі — «Қазақы тазы» моно тұқымды иттер көрмесі. Ал екіншісі — «Қазақстан кинологтар одағы Кубогы» деп аталатын ұлттық дәрежедегі көрме. Қазір елімізде ресми түрде тіркелген 3 мың 500 ден аса тазы бар екен. Алайда ауылдарда есепке алынбаған қаншама таза қанды тазылар бар. 

Осындай көрмелерде ғана қазақы тазы иелері ұлттық титулға қол жеткізіп, тұқым сапасын салыстыра алады. Сондай-ақ өз иттерін кинологиялық сарапшылар мен көпшілікке кеңінен таныстыру мүмкіндігіне ие болады. Сараптаманы ұлттық және халықаралық санаттағы төрешілер жүргізеді. Мұндай іс шаралар қазақы тазы тұқымының сақталуын, кинологиялық білім деңгейін арттыруды және Қазақстанда ит асырау дәстүрін қалыптастыруды көздейді.

Бауыржан Серікқали, Қазақстан кинологтар одағының президенті:

- Бұл зоотехникалық көрме. Себебі бұл көрмелердегі нәтижелер оның тұқымдық жұмысына әсер етеді. Сарапшыларымыз қазіргі тазыларды стандартқа сай екенін тексереді. Бұл жәй ғана әдемілік үшін жасалып жатқан жоқ, тұқымдық баға үшін жасалып жатыр. Стандартқа сәйкес иттер ары қарай тұқымдық жұмысқа қабылданып, ол иттермен жұмыс жалғасатын болады.

Елдос Майлыбаев, тазы асыраушы:

- Салюки деген ит бар. Қазіргі уақытта екеуінің қаны араласып кеткен. Сол үшін біз Сауд Арабиясынан, Польшадан содан кейін Израильдан салюкидің қанын алдыртып биолология және биотехнология институтына өтікізіп салыстырмалы түрде Қырғызстаннан да тайганың қанын алдыртып патенттеу керек. Қазіргі таңда сондай жұмыстар атқарылып жатыр. Егер таза болатын болса, біз әлемдік деңгейге шыға аламыз.