Павлодарда шырша ойыншықтарының көрмесі өтіп жатыр

Павлодар тұрғындары жаңа жыл қарсаңында шырша ойыншықтарының көрмесін тамашалауда.  

Павел Васильевтің музей-үйінде ұйымдастырылған шара көпшіліктің қызығушылығын тудырды. Өткен ғасырдан жеткен жәдігер ойыншық көп. Ұйымдастырушылардың айтуынша, көрме келушілерге мерекелік көңіл-күй сыйлады. 

Қарлығаш Қасиетова, тілші: 

- Жаңа жылдық шыршаны безендіру дәстүрі Еуропадан бастау алады. Алғашында шыршаға алма мен тәтті тоқаштар ілініпті. Бір жылы алма шықпай қалып, оның орнын шыныдан жасалған ойыншықтар алмастырады. Ал көрмеге қойылған ең көне ойыншық - мына Аяз атаның жасы жетпістен асады. 

Шыршаны безендіруге арналған ойыншықтар әр кезеңдегі маңызды оқиғалармен тығыз байланысты. Адамзат ғарышты игере бастаған уақытта жерсерік бейнесіндегі ойыншықтар пайда болса, тың игеру жылдарында жүгері түріндегі әшекейлер кең тараған. Ал тәтті тоқаш пен жеміс бейнесіндегі ойыншықтар тоқшылық пен молшылық тілегінен туындаса керек.

Жаңажылдық құттықтауларға толы ашықхаттарды да көрмеге келушілер қызығушылықпен тамашалайды. Пошта арқылы кейде кешігіп жететін сол бір хаттар бүгінгі күні ғылым мен техниканың қаншалықты алға басқанын аңғартады. Ал әрбір шыршаның жанынан табылатын Ақшақар мен Аяз ата жиынтығын музей қорына қала тұрғындарының бірі тапсырған.

Зәкия Мерц, Павел Васильев музей-үйінің басшысы: 

- Аяз аталарды музейге жерлесіміз Дмитрий Королюк әкеліп тапсырды. Оның коллекциясы мақтадан жасалған жалғыз ғана ойыншықтан басталыпты. Адамдарға ертегі сыйлағысы келетінін айтқан ол, өз ойыншықтарын музей қорына табыстады.

Көрмеге  мектеп оқушылары ата-аналарымен бірге келуде. Олар бір кездері қолмен жасалған дүниелерді көзбен көріп, өткен шаққа саяхат жасады. 

Анжелика Юсина, қала тұрғыны: 

- Мектептің шыршасын өзіміз безендіретінбіз.

Ерекше көрме жүрекке жылы естеліктерді оятады. Сонымен қатар Жаңа жыл мерекесінің сиқырын сездіретін әсер сыйлайды.