Алматыда суррогат ана баладан бас тартқан тапсырыс берушілерден ақшасын ала алмай жүр

Алматыда суррогат ана өз қызметі үшін ақы талап етіп отыр. Тапсырыс беруші сәбиден бас тартқан. Кристина Гаврилюк жаңа туған нәрестені бірден Сәбилер үйіне тапсырды, енді ол уәде етілген 7 жарым миллион теңге гонорарын алу үшін тапсырыс берушілерді іздеп жүр, деп хабарлайды Arasha.kz.

 Әйел полицияға жүгінді. Алайда жағдайды қиындатып тұрған жайт биологиялық ата-аналардың шетелдік болуы. Олар байланысқа шықпай жатыр, деп хабарлады КТК телеарнасы.

27 жастағы Кристина Гаврилюк бөтеннің баласын ақшаға көтеріп беруге келіскен. Кепілдік берілген гонорар 7 жарым миллион теңге. Суррогат анамен келісімшартты Қытайдан келген ерлі-зайыптылар жасасқан. Алматыда әйелге эмбрион салу процедурасы жасалды. Болашақ ата-аналар жүктілік кезінде ақшаны уақытылы беріп, тіпті ай сайын 200 мың теңге шамасында жалақы төлеп тұрған. Бірақ асқынуларға байланысты Кристина мерзімінен бұрын жетінші айда босанды. Клиенттер шала туған ұлды алудан бас тартқан.

«Кесар тілігінен кейін оны бірден алып кетті, сонымен бітті. Шамамен төрт сағаттан соң маған мейірбике келіп, баланы өткізіп жібергенін айтты. Бәрі дұрыс па, шетінеп кетпеді ме деп сұрадым. Ол: «Жоқ, бәрі жақсы»,  деді. Биологиялық ата-аналар алдымен баланың денсаулығын тексеру үшін талдаулар алуды талап етті. Сараптамалар бәрі дұрыс екенін көрсетті. Бала салмақ қоса бастады. Содан кейін олар ДНҚ-тест жүргізуді талап етті. ДНҚ-тест олардың баламен туыстығын растады. Осыдан кейін мен куратормен байланыста болдым. Бірақ кейін биологиялық ана жауап беруді тоқтатып, баланы алып кету керектігін айтты», - дейді Кристина Гаврилюк.

Кристина Гаврилюк дүкенде сатушы болып істейді. Өзінің алты жасар қызын тәрбиелеп отыр. Әйел осыған дейін екі рет суррогат ана болған. Екі келісім де сәтті аяқталған. Ал үшінші рет гонорарын ала алмады. Кристина ашық айтады: іс жүзінде бөтен баланы тәрбиелеуге, тіпті ол үшін жауапкершілік арқалауға ниеті жоқ. Сондықтан босанғаннан кейін бірден нәрестеден бас тарту туралы арыз жазған.

«Бұл балаға деген қандай да бір сезіміңіз бар ма? - Жоқ. Тек аяныш сезімі, өйткені солай болып қалды. Жалпы, маған дәрігер айтты, ол тастанды бала сияқты болады, өйткені оны тастап кетті ғой. Содан кейін одан бас тартылғаны туралы жазылды. Мен сол сәтте тек өзім үшін олардың маған істеген ісі үшін уайымдадым. Алдап кетті.  Демек, ол сізге керек емес қой?  Иә. Менің балам емес қой», - дейді әйел.

Биологиялық ата-аналар туралы ақпарат дерлік жоқ. Ерлі-зайыптылар Қытай азаматтары. Олардың қазір қайда екені белгісіз. Процедура жүргізілген клиниканың өзі түсініктеме беруден үзілді-кесілді бас тартты. Суррогат ана полицияға арыз жазды.

«Аталған дерек бойынша мәліметтерді зерттеуді ескере отырып, қылмыстық немесе әкімшілік құқық бұзушылық белгілерінің болмауына байланысты қылмыстық іс қозғаудан бас тарту туралы шешім шығарылды. ҚР Қылмыстық-процестік кодексінің 79-бабының нормалары мұндай оқиғалар тек сотта шешілуі тиіс екенін көрсетеді. Сондықтан азаматтық-құқықтық тәртіпте сотқа азаматтық талап арыз беру туралы ұсыныстар берілді», - дейді Алматы қалалық ПД ресми өкілі Салтанат Әзірбек.

Қазақстанда суррогат ана болуға ресми түрде рұқсат етілген. Баланы дүниеге әкелетін ананың құқықтары мен міндеттері «Неке және отбасы туралы» заңмен реттеледі. Ол әйелге медициналық көмекке, денсаулығын қорғауға және сыйақы алуға кепілдік береді. Құқық қорғаушылар алданған әйелге сотқа баруға кеңес береді. Баланың биологиялық ата-анасы шетелдіктер екенін ескере отырып, суррогат анаға Қытай елшілігіне және Сыртқы істер министрлігіне жүгіну қажет.

«Биологиялық ата-аналарға қатысты Қылмыстық кодекске сәйкес ата-аналық міндеттерін тиісінше орындамағаны үшін қылмыстық іс қозғауға болады, яғни олар баланы тастап, Қазақстан аумағынан шығып кеткен. Бұл өз баласының өмірі мен денсаулығын қауіпке қалдыру болып табылады», - дейді заңгер Ғабит Өмірбеков.

Қазір жаңа туған нәресте Сәбилер үйінде. Дәрігерлер оның жағдайын тұрақты деп бағалап отыр.