Алматыдағы 13 негізгі көшені жөндеу қашан аяқталады

Алматыдағы 13 негізгі көшені қайта жаңарту жұмыстары басталғанына бірнеше ай болды. Tengrinews.kz жұмыстың қашан аяқталатынын анықтады.

Алматы көшелерінде не болып жатыр? Сәуірде Розыбакиев, Жандосов, Жароков, Сәтбаев, Сейфуллин және Тимирязев көшелерінде жөндеу жұмыстары басталды. Маусымда Масанчи, Мүсірепов, Майлин, Меңдіқұлов, Жолдасбеков көшелерінде, Абай даңғылы мен Бұқар жырау желекжолында жұмыстар басталуы керек еді.

Tengrinews.kz 13 көшенің әрқайсында қайта жаңарту жұмыстары қазір қай кезеңде екенін және оны қашан аяқтау жоспарланғанын білді.

Жөндеу 13 көшенің тек 8-інде жүріп жатыр: жұмыстар қашан аяқталады?

Жобалардың бір бөлігін көктемде бастау уәде етілгеніне қарамастан, қазір жұмыстар 13 көшенің тек 8-інде ғана жүріп жатыр.

Соңғы мәліметтер бойынша, Розыбакиев, Жароков, Жандосов, Тимирязев, Сейфуллин, Масанчи, Сәтбаев көшелері мен Абай даңғылында жөндеу жүріп жатыр.

Қоғамдық кеңістіктерді дамыту басқармасы 8 көшенің 7-еуін 2026 жылдың соңына дейін аяқтауды көздеп отырғандарын хабарлады.

Тек Абай даңғылы ерекшелік болмақ – онда жұмыстарды тек 2027 жылы аяқтау жоспарланған.

Бұл ретте уәде етілген тағы 5 көшеде – Майлин, Меңдіқұлов, Жолдасбеков, Мүсірепов көшелері мен Бұқар жырау желекжолында жөндеу жұмыстары әлі басталған жоқ.

"Аталған жобаларды іске асыру жобалау-сметалық құжаттаманы әзірлеу аяқталып, сараптаманың оң қорытындысы алынғаннан және бюджеттік қаржыландыру бөлінгеннен кейін басталады", – деп хабарлады басқарма.

2026 жылы Алматыда 32 шақырымнан аса көше жаңартылады: жобаға не кіреді?

Басқарма мәліметінше, 2026 жылы қайта жаңарту жұмыстары қала көшелерінің 32,65 шақырымын қамтиды.

Ведомство жобаларда мыналар қарастырылғанын атап өтті:

су жинауға арналған резервуарлар салу; автоматты суару және тамшылатып суару жүйелерін салу; көшелерді көгалдандыру; шағын сәулет нысандарын орнату; плитка төселген жаңа тротуарлар; велосипед инфрақұрылымын құру; көше және саябақ шамдарының тіректерін монтаждау.

Әкімдік қайта жаңартудан кейін көшелер жаяу жүргіншілер үшін де, автокөлік жүргізушілері үшін де қауіпсіз әрі ыңғайлы болады деп үміттеніп отыр.

"Жұмыстар аяқталғаннан кейін көлік пен жаяу жүргіншілер кеңістігін реттеу, сыртқы жарықтандыруды жаңғырту, халықтың аз қозғалатын топтары үшін кедергісіз орта құру, жаяу жүргіншілер мен велосипед маршруттарының үздіксіз желісін орнату, сондай-ақ қоғамдық кеңістіктердің сапасын арттыру есебінен жол қозғалысы қауіпсіздігі деңгейінің артуы күтіледі", – деп хабарлады әкімдік.

Мерзімді кешіктіргені үшін мердігерлерге не болады?

Басқарма жұмыс барысы мен сапасын техникалық және авторлық қадағалау мамандары бақылайтынына сендірді.

Мерзімді кешіктіргені және сапасыз жұмыс үшін мердігерлерді айыппұлдар мен басқа да санкциялар күтеді.

"Мердігер ұйым жұмыс мерзімдерін бұзған, келісімшарттық міндеттемелерді тиісінше орындамаған немесе кепілдікті пайдалану кезеңінде ақаулар анықталған жағдайда, мердігерге қатысты жауапкершілік шаралары қолданылады", – деп еске салды басқарма.

Ведомство мердігер міндеттемелерді орындау мерзімдерін бұзған жағдайда, оған тұрақсыздық айыбы есептелетінін атап өтті. Келісімшарт талаптары айтарлықтай бұзылған жағдайда, тапсырыс беруші келісімшартты бұзуға, шығындарды өндіріп алуға және мердігер ұйымды мемлекеттік сатып алудың жосықсыз қатысушыларының тізіліміне қосуға бастамашылық жасай алады.

Google News арқылы жаңалықтарымызды қадағалаңыз

Жазылу