Алматыдағы Мемлекеттік академиялық қуыршақ театры айтулы халықаралық фестивальге қатысады

Алматы қаласы Мәдениет басқармасына қарасты Мемлекеттік академиялық қуыршақ театрының репертуарындағы «Ромео мен Джульетта» спектаклі алғаш рет Румынияда өтетін халықаралық «The Craiova International Shakespeare Festival» фестивалі аясында сахналанады, – деп хабарлайды Aikyn.kz.

Фестивальге әлемнің 28 елінен 90-нан астам шығармашылық ұжым қатысады. Ауқымды театр мерекесі 1994 жылдан бері Крайова қаласында тұрақты түрде ұйымдастырылып келеді. Биыл фестиваль 21-31 мамыр аралығында қаланың 32 театр алаңында өтеді.

Алматының Мемлекеттік академиялық қуыршақ театры осы ауқымды румын фестиваліне қатысатын алғашқы қазақстандық театр болмақ. «The Craiova International Shakespeare Festival» – Крайова қаласында өтетін халықаралық Шекспир фестивалі, ол әлем әдебиетін «Гамлет», «Макбет», «Король Лир», «Отелло», «Ромео мен Джульетта» және басқа да көптеген әйгілі туындымен байытқан ағылшын драматургі Уильям Шекспирдің шығармашылығын насихаттауға бағытталған.

2026 жылы фестивальге АҚШ, Канада, Ұлыбритания, Франция, Италия, Испания, Германия, Чехия, Польша, Бельгия, Молдова, Эстония, Венгрия, Австрия, Армения, Аргентина, Украина, Грузия, Үндістан, Қытай, Жапония, Кения, Оңтүстік Африка Республикасы, Оңтүстік Корея, Тайвань, Израиль, Румыния және Қазақстан театр ұжымдары қатысады.

Крайова қаласындағы Марин Сореску атындағы ұлттық театр бұл фестивальді 1994 жылдан бері өткізіп келеді. Фестивальдің мақсаты Шекспир шығармаларын заманауи тұрғыда қайта пайымдау, сондай-ақ тәжірибе мен идея алмасуға арналған креативті алаң қалыптастыру.

Фестиваль екі жылда бір рет өткізіледі. Әр жылы өзіндік ерекше тақырыбы болады. 2026 жылы фестивальдің тақырыбы – «Will matters». Бұл тіркес «Уильям Шекспир маңызды» деген мағынамен қатар, «Адам рухы, ерік-жігері мен бостандығы маңызды» деген астарды да білдіреді.

Мемлекеттік академиялық қуыршақ театры фестиваль аясында ересектерге арналған «Ромео мен Джульетта» қойылымын ұсынады. Спектакль алғаш рет 2019 жылы режиссер Дина Жұмабаеваның жетекшілігімен сахналанған. Қойылымның камералық форматы, актерлік ойын мен қуыршақ өнерінің үйлесімі, ерекше режиссерлік шешімдер, Анна Цой қойған хореография және Юлия Чернованың сценографиясы көрермендер мен театр мамандарының жоғары бағасына ие болды. Спектакль әр жылдары Канада, Болгария, Ресей, Түркия және Қазақстанда өткен халықаралық фестивальдерде бас жүлде алған.

2025 жылы «Ромео мен Джульетта» спектаклі Францияның Авиньон қаласында өткен халықаралық «Off Avignon» фестиваліне қатысты. Дәл осы фестиваль барысында Шекспир фестивалінің ұйымдастырушылары қазақстандық театрдың шығармашылығымен танысып, артистердің кәсіби шеберлігін жоғары бағалап, оларды Крайовадағы XV Халықаралық Шекспир фестиваліне шақырған.

Румыниядағы театрсүйер қауым Мемлекеттік академиялық қуыршақ театрының репертуарындағы «Ромео мен Джульетта» спектаклін 28 мамыр күні сағат 19:00-де «Cercul Militar Craiova» мәдени орталығының сахнасында тамашалай алады.

Қойылым қазақ тілінде көрсетіліп, румын және ағылшын тілінде субтитрмен беріледі.
Сараптама, зерттеу мақала, күнделікті өзекті ақпаратты «Айқынның»   TELEGRAM арнасынан табасыз.