Алматылықтар автобустардағы сығылысқа шағымдануда: әкімдік не ойлап тапты

Алматы тұрғындары қарбалас уақытта аялдамалардағы адам кептелісі мен лық толы автобустарға шағымдануды тоқтатар емес. Әкімдіктегілер жолаушылардың отыруын жеңілдету үшін тасымалдаушы ең көп адам жиналатын аялдамаларға бос автобустарды бағыттайтынын хабарлады, деп хабарлайды Tengrinews.kz тілшісі.

Аялдамалардағы кептеліс мәселесі қалай шешілмек?

Әкімдіктің мәліметінше, "Алматыэлектротранс" ЖШС қарбалас уақытта адам ең көп жиналатын аялдамаларға жолаушысыз қосымша автобустар жіберуді ұйымдастырады.

"Қарбалас уақытта жекелеген бағыттарда жолаушылар ағынының артуы байқалады, соның салдарынан жолаушыларға келіп тоқтаған автобус салонына кіру қиынға соғады. Бұл ретте кестеде қарастырылған барлық автобус желіде жоспарлы мөлшерде жұмыс істеп тұр. Жағдайды қосымша жақсарту үшін "Алматыэлектротранс" адам көп жиналатын аялдамаларға тікелей жолаушысыз бос автобустарды жіберіп жатыр", - деп хабарлады әкімдік.

Компания өкілдері диспетчерлік қызметтің жұмысы қалай ұйымдастырылғанын да айтып берді.

"Диспетчерлік қызмет бағыттардағы жағдайды нақты уақыт режимінде бақылап отырады. Қарбалас уақытта аялдамаларда адам көп жиналған тұстарға біз жедел түрде бос келетін қосымша автобустарды бағыттаймыз. Бұл жолаушылардың келесі рейсті күтпей, салонға еркін кіруіне мүмкіндік береді", - деді "Алматыэлектротранс" ЖШС пайдалану бөлімінің бастығы Алмаз Төлегенов.

Алматы әкімдігі өз кезегінде жолаушылар ағынын реттеу бойынша жұмыстардың жалғасып жатқанын атап өтті. Тасымалдаушы бағыттардағы жағдай мен аялдамалардағы жолаушылар санын ескере отырып, жедел шаралар қабылдап жатыр.

Бұл уақытта Алматы тұрғындары әлеуметтік желілерде адамға лық толы аялдамалардың видеоларын жариялап жатыр.

Осындай видеолардың бірі 21 қазанда пайда болды. Онда Тимирязев көшесіндегі "ҚазҰУ" аялдамасы түсірілген, онда ондаған адам автобус күтіп тұр.

Threads-тен көру

19 қазанда қала тұрғыны адамдардың лық толы № 38 автобусқа сығылысып мінуге тырысқаны түсірілген видеоны жариялады. Жолаушылардың салонға кіруіне сырттан бақылаушылар көмектескен.

Жағдайға жауап бере отырып, әкімдіктен бұған дейін жолдардағы кептеліс, әсіресе қарбалас уақытта, кестеден кешігу мен ауытқулар тудыратынын мәлімдеген болатын. Бұл қозғалыс интервалының ұзаруына және аялдамаларда жолаушылардың жиналып қалуына әкеп соғады.

Сондай-ақ билік қазіргі көлік кептелісі сақталған жағдайда, рейстер санын көбейту мен қозғалыс кестесін түзетудің өзі мәселені толығымен шешуге мүмкіндік бермейтінін мойындады.

Бұған дейін Алматы тұрғындары мен қонақтары лық толы автобустар мен метро станцияларындағы кептелістерге шағымданған болатын. Қарбалас уақытта жолаушыларға қоғамдық көлікке міну қиынға соғып, метроға кіреберісте ұзын-сонар кезек пайда болған. Әкімдіктегілер адамдардың жиналуын жол кептелістерімен және автобустардың қозғалыс интервалының бұзылуымен түсіндірді.

Сондай-ақ қала тұрғындарынан №118 бағытқа да қатысты шағымдар түсті. Жолаушылар автобустың шектен тыс толып кететінін айтты. Олардың сөзінше, қарбалас уақытта салонның толы болатыны соншалық, есіктер жабылмайды, ал кейбір жолаушылар кіреберісте қысылып қалады.

Алматылықтар лық толы автобусқа шағымданды. Видеодан алынған кадрлар

14 қазанда Шұғыла шағын ауданының тұрғындары автобустарды ұзақ күту мен олардың лық толы болуына байланысты желіде виде жариялады.

Көптеген шағымнан кейін қалалық мобильділік басқармасы Алматыда 210 қалалық және қала маңындағы бағыттар жұмыс істейтінін хабарлады. Желілерде 3 200-ден астам автобус пен троллейбус жүреді.

Басқарма қарбалас уақытта, әсіресе оқу жылының басталуымен, сондай-ақ қаладағы жол жөндеу жұмыстарына байланысты кептелістердің күшейетінін мойындады. Соның салдарынан автобустар жалпы ағынмен бірге тұрып қалады, бұл қозғалыс интервалының ұзаруына және салондардың лық толуына әкеледі.

Ведомство өкілдері күн сайын қоғамдық көлік жұмысын қадағалап, жолаушылар ағыны мен тұрғындардың өтініштерін талдап отыратынын мәлімдеді. Мониторинг нәтижелері бойынша қажет болған жағдайда қозғалыс схемалары түзетіледі, жаңа бағыттар ашылады немесе жұмыс істеп тұрғандары қосымша автобустармен күшейтіледі.

Бұдан бөлек, қарбалас уақытта ең көп жүктеме түсетін бағыттарға барынша көп көлік шығаруға мүмкіндік беретін жеке қозғалыс кестелері кезең-кезеңімен енгізіліп жатыр.

Редакция жағдайды бақылауды жалғастырады.

Бізді Google-дың негізгі дереккөздер тізіміне қосыңыз