Алтын тау атанған қазақ: Кимбоздан Харуки кәсіби сумодағы жолын баяндады

Алматы облысының тумасы Ерсін Балтағұл бала кезінен дзюдо мен қазақ күресімен айналысып, спортқа қызығушылық танытқан. Оның әлеуетін моңғолиялық даңқты сумошы Аса Сёрю Акинори байқап, Жапонияға шақырған. Осы шақыру Ерсіннің кәсіби жолына жаңа бағыт берді. Ол 18 жасында Күншығыс еліне аттанып, әуесқой сумо жарыстарына қатыса бастады. Кейін Нихон университетіне түсіп, студенттік сумо клубының мүшесі атанды.

Университет қабырғасында жүріп-ақ ірі турнирлерде көзге түскен спортшы жасөспірімдер арасындағы Жапония чемпионатында үздік сегіздікке енді. Бұл нәтиже оған кәсіби сумоға бірден өтуге мүмкіндік беріп, төменгі екі дивизионды айналып өтуіне жол ашты. Осылайша Ерсін мансабын жоғары деңгейден бастап, жарыс сайын шеберлігін шыңдады.

Бүгінде Ерсін кәсіби сумода бес жылдан бері өнер көрсетіп келеді. Соның ішінде үш жарым жылын ең жоғары әрі беделді Макучи (Makuuchi) дивизионында өткізді. Алғашқы кезеңде ол төменгі дивизиондарда сәтті өнер көрсетіп, сегіз ай ішінде Жюрё (Jūryō) дивизионына көтерілді. Жюрё — кәсіби сумодағы екінші жоғары дивизион саналады. Ал бір жыл екі ай ішінде спортшы сумо иерархиясының шыңына — Макучиге жетті.

— «Кимбоздан» — «алтын тау» деген мағынаны білдіреді. «Харуки» — бапкерімнің жақын досының аты. Жапонияда осы атпен өнер көрсетемін, — деді спортшы.

Сумо ерекше тәртіпті қажет етеді. Таңғы жаттығу кемінде екі-үш сағатқа созылады. Одан кейін шаш үлгісін жасау және кимоно кию міндетті. Бұл кәсіби сумошыларға қойылатын негізгі талаптардың бірі.

Ерсін Мемлекет басшысы Қасым-Жомарт Тоқаевтың Жапонияға сапары кезінде өткен кездесуді де еске алды.

— Біз университеттер арасындағы жиында жүргенбіз. Президентпен кездесу жоспарымызда болмаған. Шақырту алған соң, әрине, қобалжыдық. Бұл — үлкен жауапкершілік, — деді спортшы.

Аренаға «барыс» символымен шығатын Ерсін бұл таңдауын туған жерімен байланыстырады.

— Алматыда өскенде барысты батыл, айбарлы жануар деп таныдық. Сол себепті жеке символымды осы бейнемен жасадым. Жапон көрермендері оны құрметпен қабылдайды, — деді палуан.

Тамақтану да қатаң бақылауда. Рацион алдын ала калория мен ақуыз мөлшері бойынша есептеледі. Дегенмен, ол қазақтың ұлттық тағамдарын, әсіресе ет пен бешбармақты сағынатынын жасырмады.

Жылына бір-екі рет қана елге келетін Ерсін жас спортшыларға ең бастысы — еңбекқорлық пен тәртіп екенін ескертеді.

— Тек жаттығу жеткіліксіз. Режим, дисциплина, тұрақтылық болса ғана нәтиже болады, — деді ол.

Ерсін халықаралық ареналарда Қазақстан туын көтеру — үлкен мәртебе екенін айтты.

— Ел намысын қорғау — менің парызым. Қазақ елінің абыройын биікке шығару үшін бар күшімді саламын, — деді Кимбоздан Харуки.

Бұған дейін Токиода Президент Қасым-Жомарт Тоқаев кәсіпқой сумошы Ерсін Балтағұлмен кездескенін жазған едік.