Amanat пен Әділет бірігеді

АСТАНА, 12 маусым – Sputnik. Amanat және "Әділет" саяси партиялары бірігеді. Бұл шешімді депутаттар қолдап дауыс берді.

Amanat партиясының съезінде қатысушылар "Әділет" партиясымен бірігу туралы шешімді бірауыздан мақұлдады.

Мәжіліс депутаты Ұнзила Шапақ қоғам мен мемлекеттің мүддесіне қызмет ету үшін саяси күштердің мүмкіндіктерін біріктіру және әлеуетін одан әрі арттыру қажет деп есептейді.

"Әрине, әр партияның өз ұстанымы мен өзіндік ерекшеліктері бар. Алайда бізді біріктіретін жалпы құндылықтар әлдеқайда маңызды. Бұл – жаңа Конституцияда бекітілген әділ мемлекет құру қағидаты, тәуелсіз Қазақстанның тұрақтылығы, оның қауіпсіздігі, азаматтардың әл-ауқаты және өскелең ұрпақтың болашағы", - деді ол.

Оның айтуынша, жаңа Конституцияда бекітілген қағидаттар мен реформалар елдің саяси күштері үшін басты бағыт болып қала береді.

"Бұл қадам – саяси жүйенің табиғи дамуы және ел мүддесіне қызмет ететін күштердің ортақ мақсат үшін бірігуге дайындығы", — деп атап өтті Ұнзила Шапақ.

Павлодар облысы мәслихатының хатшысы Илья Теренченко да бастаманы қолдап, күш-жігерді шоғырландырып, жалпыұлттық мақсат төңірегінде бірігудің маңызды екенін айтты.

"Біз бұл шешімді уақтылы қадам ретінде қарастырамыз. Сайып келгенде, мұның бәрі тәуелсіздікті нығайтуға, азаматтардың өмір сүру сапасын арттыруға, Қазақстан халқының бірлігін нығайтуға және елдің тұрақты дамуына қызмет етуге тиіс", - деді ол.

Теренченко өз сөзінде президенттің жалпыұлттық құндылық пен мақсаттар төңірегіндегі күш-жігерді біріктіру туралы бірнеше рет айтқанын еске салды.