Мемлекет, бизнес және азаматтық қоғам экологиялық білім беруде бірігеді

Таяуда елордада Азаматтық форум өтті. Ілкімді іс-шара аясында Ғылым және жоғары білім министрлігі, CCI Kazakhstan компаниясы мен ««Жасыл экономиканы» қолдау және G-Global-ды дамыту» Коалициясы» ЗТБ арасында «ReStart» бірлескен жобасын іске асыру жөніндегі  жоспарға қол қою рәсімі өтті, деп хабарлайды Egemen.kz.

Жоспар Мемлекет басшысы Қасым-Жомарт Тоқаевтың халыққа Жолдауында көрсетілгендей ауқымды экологиялық апат қаупіне алаң көңілмен қарап, студент жастарда экологиялық мәдениетті қалыптастыру мен айналмалы экономиканы дамытуға тарту бағытында, сондай-ақ «Білім туралы» Заңға сәйкес әзірленді. Қол қойылған жоспардың мақсаты – экология, тұрақты даму мен экологиялық білім беру саласындағы бастамаларды іске асыруға мемлекеттің, азаматтық қоғамның және бизнестің өзара іс-қимылының нақты платформасын құру.

Жоба экологиялық мәдениетті дамытуға, тұрақты даму қағидаттарын ілгерілетуге әрі «жасыл экономика» негіздерін елдің жоғары білім беру жүйесіне енгізуге бағытталған. Жоспардың негізгі міндеттерінің қатарында экологиялық білім беру мен тәрбие саласындағы Жастар бастамаларын дамытуға жәрдемдесу, ЖОО базасында студенттік эко-клубтар мен ғылыми қауымдастықтарды дамыту, әр қалдықты бөлек жинау мен «жасыл кампустарды» дамыту жөніндегі жобаларды іске асыру, сондай-ақ «жасыл» жобаларды ілгерілету және серіктестер мен инвесторларды тарту бар.

Жоспар CCI Kazakhstan компаниясының он жылдық тәжірибесі мен табысты «3.2.1. Start!» жобасының жетістіктеріне негізделген, және де ол жоба биылғы жылы «ReStart» деп аталатын жаңа форматқа көшіп, тұрақты даму мен эко-ағартуға назар аудара отырып, пластикті бөлек жинау әрі қайта өңдеу мәдениетін дамытудың ең ірі экоплатформасына айналды. Тек қана 2024 жылдың өзінде жоғары оқу орындарының студенттері – ҚазМАУ, ҚБТУ, Satbayev University, ҚазҰАЗУ, М.Қозыбаев атындағы СҚУ және басқалар -17 тоннадан астам пластикалық қалдықтарды жинап, оларды жаңа бұйымдарға айналдырған.

Биыл жобаның тоғызыншы маусымында студенттердің жалпы саны 100 мыңнан асатын 14 ЖОО қатысты. Бір жыл ішінде студенттер 35 тоннадан астам пластик жинады, бұл өткен маусымның көрсеткіштерінен асып түсті және жоба бүкіл ел бойынша 15 сенбілік өткізді. CCI Kazakhstan компаниясының корпоративтік және реттеуші қатынастар жөніндегі директоры Әлима Исембаева жоспарға қол қою рәсімінде сөз сөйледі.

«Биыл жоба өзінің онжылдығын атап өтуде, ол дамудың жаңа кезеңімен – «ReStart» жаңартылған атауымен және ауқымды миссиясымен, студенттердің күнделікті өміріне қалдықтарды жүйелі түрде бөлек жинауды әрі орнықты даму қағидатын енгізе отырып, елдің одан да көп университеттерін қамту сынды мәселемен сай келіп отыр. Ғылым және жоғары білім министрлігімен бірлесіп жұмыс істеу-азаматтық қоғамның, мемлекеттің және бизнестің тиімді серіктестігі нақты нәтижеге қалай қол жеткізетінін әрі экологиялық жауапты ұрпақты қалыптастыра алатынын көрсететін маңызды қадам», деді ол.

Жобаны іске асыру жылдарында ондаған студенттік эко-клубтар құрылды, қалдықтарды бөлек жинау мен қайта өңдеу бойынша көптеген бастамалар әзірленді, олардың көпшілігі университеттердің тұрақты тәжірибесіне айналды. Атап айтқанда, Satbayev University-де пластикалық қақпақтарды жинау және оларды шағын сәулет нысандарының элементтеріне қайта өңдеу жүйесі енгізілді, ҚазҰАЗУ-да «Жасыл кампус» жобасы іске асырылды, ал М.Қозыбаев атындағы СҚУ-да студенттер қайта өңделген пластиктен жасалған кәдесый желісін дамытуда.

«ReStart» – тың жарқын түлектерінің қатарына Rocket Plastic, Recycle Birge және EcoCashback – тұрақты инфрақұрылымдар мен дамуды жалғастыратын әлеуметтік кәсіпорындарға айналған стартаптар кіреді. «ReStart» бастамасы – тұрақты дамудың жаңа кезеңі әрі Қазақстанның 2030 – күн тәртібін іске асыруға қосқан үлесі болмақ. «Біз мемлекеттің, бизнестің және азаматтық қоғамның күш-жігерін біріктіру Қазақстанның БҰҰ-ның Тұрақты даму мақсаттарына қол жеткізуі үшін берік негіз құратынына сенімдіміз», деді Коалицияның Басқарма төрағасы Әлия Рахымбекова.

«Жасыл экономиканы» қолдау және G-Global-ды дамыту» Коалициясы» ЗТБ құрылған сәттен бастап елімізде тұрақты даму мен климаттық ағарту идеяларын ілгерілетудің сараптамалық, әдістемелік және қоғамдық орталығы саналады. Құжатқа Ғылым және жоғары білім министрлігі тарапынан ведомствоның Аппарат басшысы Мадияр Қожахмет қол қойып, игі шара экологиялық білім беру мен жастар тәрбиесін дамытудағы маңызды қадам екенін айтты.

«ReStart» жобасы-жастардың экологиялық ойлауы мен табиғатқа ұқыпты қарау мәдениетін бірлесіп қалыптастырудың жарқын мысалы. Жоспарды іске асыру айтарлықтай нәтиже беретініне әрі еліміздің тұрақты болашағын дамытуға үлес қосатынына сенемін», деді Мадияр Қожахмет.