Әмірліктер инклюзивті қоғам құрып жатыр

Араб әмірліктері мүмкіндігі шектеулі жандарға барынша қолайлы жағдай жасап, қоғамдағы кей қате түсінікті өзгертті. Ең алдымен, елде оларды «мүгедек» деп атауға мүлде тыйым салынды. Керісінше ерік-жігері мен өмірге деген талпынысын ескеріп, барлық мекемелерде жұмыс істеуіне мүмкіндік жасалды. Осы мақсатта мемлекет арнайы заң қабылдап, инфрақұрылымды жаппай жақсартуға кірісті.

Бұл – Дубайдағы мүмкіндігі шектеулі жандарға арналған ауқымды іс- шаралардың бірі. Кейінгі жылдары тұрақты түрде өткізіліп келеді. Форум әрі көрме түрінде ұйымдастырылып, елдің түкпір-түкпірінен ерік-жігері еш мұқалмаған жандарды жинайды. Солардың бірі – Дубай полициясында қызмет ететін Хамду Бауазир. Жастайынан арбаға таңылған ол қоғамда өз орнын тапқан. Ел қатарлы еңбек етіп, білім-біліктілігін дәлелдеп жүр.

Хамду Бауазир, Дубай полициясы жанындағы кеңес мүшесі:

- Дубай полициясы ерік-жігері жоғары жандар үшін арнайы сервистерді іске қосты. Қызметкерлер оқытудан өтіп, шұғыл көмек көрсетуге бейімделді. Бірі өз бетінше қозғала алмауы, енді бірі сөйлесе алмауы мүмкін ғой. Сондықтан бұл азаматтармен тікелей қатынас орната білетін мамандар да қатарымызға қосылды. Мұның бәрі біздің барлық тұрғыда инклюзивті бола түскенімізді білдіреді. 

Көрмеде Хамду секілді түрлі мекемеде табанды қызмет етіп  жүргендер ерік-жігері ғана емес, кәсібилігін көрсетті. Бірі инклюзивті білім беру саласындағы жаңашыл тәжірибесімен үлгі болса, енді бірі әлеуметтік қызметтерді қолжетімді ету, инфрақұрылым сапасын жақсарту тұрғысында идея ұсынды. Бұл тұрғыда араб мемлекеті келешекке біраз мақсат қойып отыр. Мұндағылар әмірлік жерін мүмкіндігі шектеулі жандар үшін де барынша қолайлы етпек. «Бұл бір есептен - Біріккен ұлттар ұйымы шеңберінде бекітілген баршаға ортақ міндеттеме», - дейді мамандар.

Рауан Мыңбай, тілші:

- Әмірлік үкіметі тағдыр тауқыметіне төзіп, қиындықпен күресіп келе жатқан жандарды «мүгедек» деп қарастыруды доғарып, «мүсіркеуге» тыйым салды. Керісінше, қоғамның барлық саласында кедергісіз жұмыс істеуіне жағдай жасап жатыр. Полиция, аурухана, мектеп, әуежай сынды мекемелерге ерік жігері еш мұқалмаған осындай жандарды жұмысқа қабылдап, қабілеттерін тиісті мақсатта қолдануды тапсырды. Нәтижесінде олар қоғамда өз орнын тауып, белсенді өмір салтын бастады. Тәжірибе халықаралық ұйымдар аясында мойындалып, көп елге үлгі болып отыр.

Автор: Рауан Мыңбай