Ән айтудан рекорд жасайды

Кейінгі кезде елі­мізде осындай ерекше үр­діс бас­талды: биылғы мау­сым айында семейлік әнші Қай­рат Қабышев бес жарым сағат бойы тоқтамай 100 ән шырқап, Азия мен Африка елдерінің әлемдік рекордтар кітабы — GBR-ға (GlOBAL BEST of REKORDS) тіркелген еді. Одан кейін жақында, 22 шілде күні Тараз қаласында әнші, термеші Бақыт Шағырбаев 6 сағат ішінде 114 ән, терме орындап, рекордты жаңартты. Ал енді оралдық танымал әншілер Қатимолла Бердіғалиев пен Қайрат Кәкімов бұдан да асып түспек: Қазақстанның еңбек сіңірген қайраткері, «Парасат» орденінің иегері, алдағы жылы 75 жасқа шығатын ақын әрі әнші Қатимолла Бердіғалиев үз­діксіз 120 ән айтуға тәуекел етсе, Қазақстан Республикасы мәдениет саласының үздігі, «Құрмет» орденінің иегері Қайрат Кәкімов бірден 132 әнді үзбей шырқауға ниет­теніп отыр. 

Орал қаласында қыр­күйек айының соңына қарай өтеді деп жоспарланған айтулы іс-шараның бас төрешісі, Қазақстанның еңбек сіңірген қайраткері, фольклортанушы ғалым Берік Жүсіптің айтуынша, сахнада бірнеше сағат тік тұрып ән шырқау – өте қиын, үлкен ерлікке пара-пар әрекет. «Ондай тәуекелдің үдесінен шыға алған рекордшы қандай да марапат пен мадаққа лайық. Одан бұрын мұның қауіп-қатер тәуекелі де бар. Осыдан 101 жыл бұрын Ташкент қаласында 100 ән айтуды межелеп, бәйгеге басын тіккен Құрманбек Жан­дар­беков 68-әнге келгенде қан түкірген екен», дейді ғалым.

Дегенмен, оралдық ән­шілер қазір қызу дайын­дықты бастап та кеткен. Көздеген межеден шыға алатынына өнер­паз­дардың өздері де, әріп­тестері де сенімді. Бұл биыл ғана «академиялық» де­ген атаққа ие болған өнер ұжымының мерейлі мерекесіне лайықты тарту болмақ. Филармония директоры Бауыржан Халиолла айтулы іс-шараға дайындық қызу жүріп жатқанын айтады. Тіпті халықаралық «GlOBAL BEST of REKORDS» ұйымы да сахналық рекордты тіркеуге әзір екенін айтып хат жолдаған.

Батыс Қазақстан облысы