Ақмола облысында ауыл шаруашылығына ЖИ енгізілді

Ақмола облысында ауыл шаруашылығы саласына жасанды интеллект енгізіліп жатыр.

Пилоттық жоба шаруаларға маңызды шешімдер қабылдап, өнімділікті арттыруға мүмкіндік береді. Қазір өңірде  20-ға жуық серіктестік сандық жүйеге көшкен. Нәтижесі жаман емес, дейді жауаптылар. Мәселен, соңғы жылдары аграрлы облыс рекордттық көрсеткіште өнім жинады. Қамбаға 7 жарым млн тонна астық құйылды.

Денис Швайбович басқаратын шаруашылық өңірде алғашқылардың бірі болып цифрландыру жұмыстарын қолға алды. Қазір құжаттарының 80 пайызы сандық жүйеге еңгізілді. Сондықтан шаруа кабинетінен шықпай ақ алқаптағы ахуалды біліп отырады.

Денис Швайбович, шаруа қожалығының жетекшісі:

- Сандық жүйе біріншіден біздің шығынды азайтуға көмектеседі. Оның ішінде жанар-жағармай, химиялық дәрілер мен тұқым қорын 30-40 пайызға дейін үнемдейді. Сонымен қатар қағазбастылықтан арылдық десек болады.  Бұл бізге тез, әрі батыл қадам жасауымызға мүмкіндік береді.

Аймақта алғаш рет егістікті әртараптандыруға байланысты майлы дақылдардың үлесі екі жарым есеге артты. Өңір диқандары 500 мың гектар алқапқа майлы дақылдар сеуіп, 600 мың тонна өнім алды.

Денис Швайбович, шаруа қожалығының жетекшісі:

- Соңғы жылдары майлы дақылдарға сұраныс артты. Сондықтан біз егіс алқаптарының 50 пайызына зығыс меен күнбағыс ектік. Ал дайын өнімді шетелге емес, ішкі нарыққа өткіземіз. Бағасы да көңілге қонымды. Өйткені, қазір өңірде терең өндеу саласы жақсы дамып келеді.

Жалпы ақмолалық шаруалар 5,5 млн гектар алқапты игерді. Қамбаға жеті жарым миллион тонна астық құйылды. Оның 70 пайыздан астамы үшінші сұрыпты, қамырлылығы жоғары бидай. Жиналған астықтың басым бөлігі шетелге экспортталады. 5 жылдық үзілістен кейін Әзербайжан мен Грузия бағытындағы тасымалдар қайта жанданды.

Мұрат Балпан, облыс әкімінің орынбасары:

- 3,5 млн тоннадан астам, жаңа егіннен 1,5 млн,тонна астық Қытай, Иран, Өзбекстан, Тәжікстан және Әзербайжан елдеріне экспортталды. Эстонияның астық терминалымен меморандумға қол қойылуының арқасында Ақмола облысының өнімі алғаш рет Еуропа нарығына шықты.

Шаруалардың мол өнім алуына мемлекеттік қолдау да сеп болды. Мәселен, өңірде агроөнеркәсіп кешенін дамытуға 253 млрд теңге бөлінді. Оның 118 млрд теңгесі жеңілдетілген несие.  Бұл шаруалардың кәсібін дамытып, қамбаны алтын дәнге толтыруына мүмкіндік берді.

Абзал Азаматұлы, Евгений Шинкаренко